Breaking News: टी-२० वर्ल्डकपसाठी BCCIचा मोठा निर्णय; बुमराहच्या जागी मिळाली अनुभवी गोलंदाजाला संधी

मुंबई: आगामी टी-२० वर्ल्डकपसाठी भारतीय क्रिकेट संगात मोहम्मद शमीची निवड करण्याचा निर्णय बीसीसीआयने घेतला आहे. दुखापतीमुळे संघातील आघाडीचा जलद गोलंदाज जसप्रीत बुमराह स्पर्धेबाहेर झाला होता. त्याच्या जागी निवड समितीने मोहम्मद शमीला संधी दिली आहे.


ऑस्ट्रेलियात होणाऱ्या टी-२० वर्ल्डकपमध्ये भारताची पहिली मॅच २३ ऑक्टोबर रोजी पाकिस्तानविरुद्ध होणार आहे. नुकत्याच झालेल्या दक्षिण आफ्रिकेविरुद्धच्या टी-२० मालिकेतील पहिल्या लढतीनंतर स्टार गोलंदाज जसप्रीत बुमराहला दुखापत झाल्याचे समोर आले होते. त्यानंतर काही दिवसात बीसीसीआयने तो वर्ल्डकपमधून बाहेर झाल्याचे जाहीर केले. बुमराहचे संघाबाहेर होणे हे टीम इंडियासाठी धक्कादायक होते.

वाचा-क्रिकेट चाहत्यांना मोठा झटका; पुढील इतकी वर्ष भारत-पाकिस्तान मालिका होणार नाही

बुमराह संघाबाहेर झाल्याच्या वृत्तानंतर निवड समिती त्याच्या जागी कोणाला संधी देते याची उत्सुकता चाहत्यांना होती. यासाठी मोहम्मद शमी, मोहम्मद सिराज, दीपक चाहर आणि शार्दुल ठाकूर ही चार नावे चर्चेत होती. अखेर निवड समितीने अनुभवी शमीची निवड केली. दीपक चहरचे नाव देखील आघाडीवर होते. मात्र त्याला आफ्रिकेविरुद्धच्या मालिकेत दुखापत झाली होती.

टी-२० वर्ल्डकपच्या आधी भारतीय संघ ऑस्ट्रेलिया आणि न्यूझीलंडविरुद्ध सराव सामने खेळणार आहे. शमी ऑस्ट्रेलियात दाखल झाला आहे. ठाकूर देखील ऑस्ट्रेलियाला रवाना होणार आहे.

वाचा- टी-२० वर्ल्डकपच्या आधीच उघडी पडली टीम इंडिया; असंच चालू राहिलं तर...

टी-२० वर्ल्डकपसाठीचा भारताचा संघ
रोहित शर्मा (कर्णधार), केएल राहुल (उपकर्णधार), विराट कोहली, सूर्यकुमार यादव, दीपक हुड्डा, ऋषभ पंत, दिनेश कार्तिक, हार्दिक पंड्या, आर अश्विन, युजवेंद्र चहल, अक्षर पटेल, भुवनेश्वर कुमार, हर्षल पटेल, अर्शदीप सिंग, मोहम्मद शमी

टी-२० वर्ल्डकपमधील भारताचे वेळापत्रक
२३ ऑक्टोबर- पाकिस्तानविरुद्ध दुपारी १.३० वाजता मेलबर्न येथे
२७ ऑक्टोबर- ग्रुप ए रनर-अपविरुद्ध दुपारी १२.३० वाजता सिडनी येथे
३० ऑक्टोबर- दक्षिण आफ्रिकेविरुद्ध संध्याकाळी ४.३० वाजता पर्थ येथे
२ नोव्हेंबर- बांगलादेशविरुद्ध दुपारी १.३० वाजता एडिलेड येथे
६ नोव्हेंबर- ग्रुप बी विजेत्याविरुद्ध दुपारी १.३० वाजता मेलबर्न येथे