'हसन अली फिक्सर, तर त्याची बायको रॉ एजंट'; नाराज चाहत्यांनी तोडले अकलेचे तारे

दुबई : टी-२० विश्वचषकात सलग पाच सामने जिंकून उपांत्य फेरीत पोहोचलेल्या पाकिस्तान संघाची सर्व स्वप्ने एका झटक्यात चक्काचूर झाली. दुबईत खेळल्या गेलेल्या दुसऱ्या उपांत्य फेरीच्या रोमहर्षक झालेल्या सामन्यात ऑस्ट्रेलियाने पाकिस्तानचा पाच गडी राखून पराभव केला. अखेरच्या क्षणी ऑस्ट्रेलियन फलंदाज मॅथ्यू वेडचा झेल सोडणाऱ्या हसन अलीवर पाकिस्तानचे चाहते या पराभवाचे खापर फोडत आहेत. वेडच्या तुफानी फलंदाजीमुळे ऑस्ट्रेलियाला पाकिस्तानचा पराभव करता आला.

वाचा- ज्याच्यामुळे पराभव झाला असता तोच ठरला सुपरहिरो; ७ चेंडूत विस्फोटक फलंदाजी

पाकिस्तानने ऑस्ट्रेलियासमोर विजयासाठी १७७ धावांचे लक्ष्य ठेवले होते. ऑस्ट्रेलियाच्या संघाने ९६ धावांत पाच विकेट गमावल्या, तेव्हा पाकिस्तानचा विजय निश्चित वाटत होता, पण मार्क्स स्टॉइनिस आणि मॅथ्यू वेड यांनी शानदार भागीदारी करत ऑस्ट्रेलियाला विजय मिळवून दिला. सामन्याच्या १९ व्या षटकात हसन अलीने वेडचा झेल सोडला, त्यानंतर वेडने पुढच्या तीन चेंडूत तीन षटकार मारत पाकिस्तानचा विजय हिसकावून घेतला.

वाचा- न्यूझीलंडच्या खेळाडूने हे काय केले; रागाच्या भरात हात मोडून घेतला, फायनलच्या आधी मोठा धक्का

हसन अलीच्या पत्नीला केले ट्रोल
संघाच्या पराभवामुळे पाकिस्तानचे चाहते खूपच निराश झाले आहेत आणि हसन अलीला जोरदार ट्रोल करत आहेत. हसन अलीसह त्याच्या पत्नीलाही ट्रोल केले जात आहे. ती मूळची भारतातील आहे. त्यामुळे काही चाहत्यांनी त्याला संघातून वगळण्याची मागणी केली आहे, तर काहींचे म्हणणे आहे की, त्याला विश्वचषक खेळण्याची संधी द्यायला नको होती. काही लोकांनी त्याला शिया असल्यामुळेही ट्रोल केले आहे. हसन अलीने २०१९ मध्ये भारतीय वंशाच्या सामिया आरजूशी लग्न केले. चाहत्यांनी त्याच्या पत्नीवर रॉ एजंट असल्याचे आरोप केले आहेत.

वाचा- रोहित शर्माला कसोटीचे कर्णधारपद का दिले नाही? जाणून घ्या खर कारण...

गोलंदाजीतही केली निराशा
गोलंदाजीतही हसन अली काही विशेष करू शकला नाही. त्याने चार षटकात एकही विकेट न घेता ४४ धावा दिल्या. अलीने टाकलेल्या डावाच्या १८ व्या षटकात स्टॉइनिस आणि वेड यांनी १५ धावा जमा केल्या, ज्याचा परिणाम पुढच्या षटकात स्पष्टपणे दिसून आला. वेडने मारलेला एक चेंडू अलीच्या दिशेने गेला होता, पण त्याला तो झेल टिपता आला नाही. चांगल्या लयीत असलेल्या वेडने शाहीन आफ्रिदीच्या षटकात सलग तीन षटकार ठोकून एक षटक आधीच संघाला विजय मिळवून दिला.