भारत व इंग्लंड यांच्यातील सेमी फायनलचा सामना कधी, कुठे आणि किती वाजता रंगणार, जाणून घ्या...

मेलबर्न : भारताचा सामना आता सेमी फायनलमध्ये इंग्लंडबरोबर होणार आहे. कारण आता भारतापुढे इंग्लंडचे आणि पाकिस्तानसमोर न्यूझीलंडचे आव्हान असणार आहे. पण भारताचा इंग्लंडबरोबरचा सामना आता कधी, कुठे आणि किती वाजता होणार आहे, याचे अपडेट्स आता समोर आले आहेत.

झिम्बाब्वेचा विजय भारताच्या पथ्यावर पडला आहे. भारताने विजयासह अव्वल स्थान पटकावले, त्यामुळे आता त्यांचा सामना पहिल्या गटामधील दुसऱ्या स्थानावर असलेल्या संघाबरोबर होणार आहे. पहिल्या गटात पहिल्या स्थानावर न्यूझीलंड आहे, तर दुसरे स्थान इंग्लंडने पटकावले आहे. त्यामुळे आता भारताचा सेमी फायनलमध्ये सामना हा इंग्लंडबरोबर होणार आहे. टी-२० विश्वचशषकातील दुसरा सेमी फायनलचा सामना हा आता पाकिस्तान आणि न्यूझीलंड यांच्यामध्ये होणार असल्याचे स्पष्ट झाले आहे. भारत आणि इंग्लंड यांच्यातील सामना आता १० नोव्हेंबरला गुरुवारी अॅडलेडच्या मैदानात होणार आहे. त्यापूर्वी पाकिस्तान आणि न्यूझीलंड यांच्यातील पहिला सामना हा बुधवारी ९ नोव्हेंबरला सिडनीच्या मैदानात खेळवण्यात येणार आहे. हे दोन्ही सामने दुपारी १.३० वाजता सुरु होणार आहेत आणि स्टार स्पोर्ट्सवर त्यांचे लाइव्ह प्रसारण पाहता येणार आहे.

भारताच्या विजयाने सर्व समीकरण बदलले आहे. या सामन्यापूर्वी पाकिस्तानने जेव्हा विजय मिळवला होता तेव्हा त्यांनी गुणतालिकेत अव्वल स्थान पटकावले होते. पण भारताने झिम्बाब्वेवर विजय साकारला आणि त्याने पाकिस्तानला मागे सारत आता गुणतालिकेत अव्वल स्थान पटकावले आहे. कारण पाकिस्तानचे विजयानंतर सहा गुण झाले होते. पण त्यानंतर भारताने विजय साकारला आणि त्यांचे आठ गुण झाले त्यांनी आता गुणतालिकेत अव्वल स्थान पटकावले आहे. जर भारत दुसऱ्या स्थानावर राहिला असता तर त्यांना न्यूझीलंडचा सामना करावा लागला असता. पण भारताने झिम्बाब्वेवर विजय साकारला आणि त्यांना आता इंग्लंडच्या संघाशी दोन हात करावे लागणार आहेत. त्यामुळे भारताला सेमी फायनलमध्ये जिंकण्याची संधी जास्त असल्याचे म्हटले जात आहे. कारण इंग्लंडपेक्षा न्यूझीलंडचा संघ सध्याच्या घडीला चांगल्या फॉर्मात असल्याचे पाहायला मिळत आहे.