टी-२० वर्ल्डकपमधील मोठी अपेडट; सेमीफायनलचा पहिला संघ ठरला

ॲडलेड: टी-२० विश्वचषकातील सुपर १२ च्या गट सामन्यात न्यूझीलंड संघाने उपांत्य फेरीतील आपले स्थान जवळपास निश्चित केले आहे. शुक्रवारी (४ नोव्हेंबर) झालेल्या सामन्यात त्यांनी आयर्लंडचा ३५ धावांनी पराभव केला. या पहिल्या गटामध्ये अद्याप दोन सामने बाकी असले तरी त्यानंतरच उपांत्य फेरीतील दोन संघ निश्चित होतील.

आयर्लंडचा पराभव केल्यानंतर न्यूझीलंड संघाचे ७ गुण झाले आहेत. यासह, तो त्यांच्या गटात शीर्षस्थानी आहे. न्यूझीलंडचा नेट रन रेटही खूप चांगला आहे. आत या संघाला ऑस्ट्रेलिया आणि इंग्लंड टक्कर देऊ शकतात. जर या दोन्ही संघांनी आश्चर्यकारक कामगिरी केली आणि अतिशय चांगल्या नेट रनरेटने सामना जिंकला तर ते न्यूझीलंडला बाद करू शकतील. वरील दोन्ही संघांच्या अशी कामगिरीची अपेक्षा मात्र कमी असल्याचे दिसत आहे, कारण न्यूझीलंडच्या तुलनेत या दोन्ही संघांना १०० पेक्षा अधिक धावांनी सामना जिंकण्याची आवश्यकता आहे. त्यामुळे आता सुपर-१२ च्या पहिल्या गटातील आणि टी-२० विश्वचषकातील पहिला संघ उपांत्य फेरीत पोहोचला आहे. न्यूझीलंडचा हा संघ कसा जिंकला पाहूया.

वाचा: टी-२० वर्ल्डकपची फायनल भारत विरुद्ध....; दिग्गज कर्णधाराने निकाल देखील सांगितला

न्यूझीलंडकडून १८६ धावांचे लक्ष्य

या सामन्यात न्यूझीलंड संघाने नाणेफेक गमावून प्रथम फलंदाजी केली. यादरम्यान सलामीवीर फिन ऍलन (३२) आणि डेव्हॉन कॉनवे (२८) यांनी शानदार सुरुवात केली. यानंतर कर्णधार केन विल्यमसन तिसऱ्या क्रमांकावर आला आणि त्याने ३५ चेंडूत ६१ धावांची खेळी खेळली. मध्यंतरी डॅरेल मिशेलने २१ चेंडूत ३१ धावा केल्या. अशाप्रकारे न्यूझीलंड संघाने ६ बाद १८५ धावा केल्या.

आयर्लंडकडून वेगवान गोलंदाज जोशुआ लिटलने गोलंदाजीत चमकदार कामगिरी केली. त्याने या विश्वचषकाची दुसरी हॅट्रिक घेतली. जोशुआने केन विल्यमसन, जिमी नीशम आणि मिचेल सँटनर यांना तंबूत धाडले. या सामन्यात जोशुआने ४ षटके टाकली, ज्यात त्याने २२ धावा देऊन ३ बळी घेतले.

हेही वाचा: T20 World Cup - आयर्लंडच्या लिटिलची मोठी कामगिरी,न्यूझीलंडविरुद्ध तुफानी



आयर्लंडने हा सामना ३५ धावांनी गमावला

१८६ धावांच्या लक्ष्याचा पाठलाग करताना आयर्लंड संघाची सुरुवात चांगली झाली. पॉल स्टर्लिंगने २७ चेंडूत ३७ धावा केल्या. तर दुसरा सलामीवीर आणि कर्णधार अँड्र्यू बालबर्नीने २५ चेंडूत ३० धावा केल्या. याशिवाय एकाही फलंदाजाला धावा करता आल्या नाहीत. अशाप्रकारे आयर्लंडच्या संघाला ९ गडी बाद १५० धावाच करता आल्या. अशा प्रकारे आयर्लंड हा सामना ३५ धावांनी पराभूत झाला. लोकी फर्ग्युसनने ३ बळी घेतले.

वाचा: बुमराहसारखा अजून एक यॉर्कर स्पेशालिस्ट भारताकडे, पण संघात स्थान मिळणं झालंय कठीण

या विजयानंतरही न्यूझीलंड संघ बाद होऊ शकतो का?

या विजयानंतरही न्यूझीलंड संघ उपांत्य फेरीच्या शर्यतीतून बाहेर पडू शकतो का, या प्रश्नाचे उत्तर आता चाहते जाणून घेण्याचा प्रयत्न करत आहेत. याचे उत्तर होय, किवी संघ बाद होऊ शकतो. मात्र यासाठी ऑस्ट्रेलियाला शेवटचा उर्वरित सामना सुमारे १८५ धावांच्या फरकाने जिंकावा लागेल. यासोबतच इंग्लंडलाही त्यांच्या शेवटच्या सामन्यात श्रीलंकेला जवळपास १२८ धावांनी पराभूत करावे लागणार आहे.