नेटकरी म्हणतात, पाकिस्ताननं अम्पायर खरेदी केलेत वाटतं! बांगलादेशविरुद्ध 'तो' निर्णय वादात

ऍडलेड: टी-२० विश्वचषक स्पर्धेतील उपांत्य फेरीतील संघ ठरले आहेत. पहिल्या गटातून न्यूझीलंड आणि इंग्लंडनं उपांत्य फेरी गाठली. तर दुसऱ्या गटातून भारत आणि पाकिस्ताननं उपांत्य फेरीत धडक मारली आहे. पाकिस्तानची स्पर्धेतील सुरुवात अडखळत झाली. मात्र नेदरलँड्स, दक्षिण आफ्रिका आणि बांगलादेशला पराभूत पाकिस्ताननं उपांत्य फेरीत प्रवेश केला. बांगलादेशविरुद्धचा सामना पाकिस्तानसाठी महत्त्वाचा होता. या सामन्यात पंचांकडून एक मोठी चूक घडली. याचा फटका बांगलादेशला बसला.

यंदाचा विश्वचषक अनेक धक्कादायक निकालांमुळे चर्चेत आहे. आर्यलंड, नेदरलँड्स, झिम्बाब्वेसारख्या संघांनी इंग्लंड, दक्षिण आफ्रिका, पाकिस्तानसारख्या बलाढ्य संघांना पाणी पाजलं. मात्र या स्पर्धेतील अम्पायरिंग खराब झालं आहे. आजच्या पाकिस्तान वि. बांगलादेश सामन्यातही याचा नमुना पाहायला मिळाला. बांगलादेशचा अष्टपैलू खेळाडू शाकिब अल हसनला चुकीच्या पद्धतीनं पायचीत देण्यात आलं.

पाकिस्तानविरुद्धच्या सामन्यात ११ व्या षटकात बांगलादेशचा फलंदाज सौम्या सरकार बाद झाला. त्यानंतर कर्णधार शाकिब मैदानात आला. मात्र शादाब खानच्या पाचव्या चेंडूवर पंचांनी शाकिबला बाद दिलं. शाकिब पायचीत झाला. मात्र प्रत्यक्षात चेंडू शाकिबच्या बॅटला लागला होता. शाकिब भोपळा न फोडताच माघारी परतला. पंचांच्या या निर्णयाबद्दल बांगलादेशी चाहत्यांनी संताप व्यक्त केला. पाकिस्तानी क्रिकेट बोर्डनं पंचांवर पैसे खर्च केले आहेत वाटतं, अशा स्वरुपाच्या प्रतिक्रिया ट्विटरवर पाहायला मिळत आहेत.