पर्थ : भारताविरुद्धच्या पराभवानंतर पाकिस्तानचा सामना आज तुलनेने दुबळ्या झिम्बावे संघाबरोबर झाला, पण त्याच झिम्बावेच्या धुरंधरांनी पाकला टी ट्वेन्टी विश्वचषकाच्या मैदानात धूळ चारुन सगळ्यांनाच तोंडात बोटे घालायला लावली. बाबर आझम, मोहम्मद रिजवान, इफ्तिकार अहमद, शादाब, शान मसूद, मोहम्मद नवाब, अशा एकापेक्षा एक दिग्गज फलंदाजांची फळी असताना पाकिस्तानी संघाला १३० धावांचं आव्हान पेलवलं नाही. अखेरच्या षटकात ११ धावांची गरज असताना पाकिस्तानने ९ धावाच केला पर्यायाने पाकिस्तानी संघाचा एका धावेने पराभव झाला. सामन्याची अखेरची ओव्हर खूपच रंगतदार झाली. परंतु दबावापुढे पाकिस्तानी संघ पुन्हा एकदा झुकला. भारतानंतर झिम्बावे संघानेही पाकला पराभवाचा धक्का देऊन पाकचा टी ट्वेन्टी विश्वचषकातला मार्ग अडचणीचा केला आहे.
अखेरच्या षटकात पाकिस्तानला ११ धावांची गरज होती. ब्रॅड इव्हान्सच्या पहिल्या चेंडूवर स्ट्राईकला असलेल्या नवाजने तीन धावा घेतल्या. त्यानंतर पुढच्याच चेंडूवर वसीमने चौकार मारला. आता पाकिस्तानला चार चेंडूत चार धावा करायच्या होत्या. त्यानंतर तिसऱ्या चेंडूवर वसीमने एक धाव घेतली. आता समीकरण होतं, तीन चेंडूत तीन धावा.... चौथ्या चेंडूवर नवाजला एकही धाव घेता आली नाही. मग समीकरण झालं दोन चेंडूत तीन धावा. भारताविरुद्धच्या सामन्यात ज्या नवाजने भारताला घाम फोडला, तोच नवाज आता स्ट्राईकवर होता. त्याच्यावर दबाव वाढला होता... नवाज मोक्याच्या क्षणी पाचव्या चेंडूवर बाद झाला. शेवटच्या चेंडूवर तीन धावा करायच्या होत्या, पण शाहिन शाह आफ्रिदीला एकच धाव करता आली. सरतेशेवटी पाकिस्तानी संघाचा १ धावेने सनसनाटी पराभव झाला. हा पराभव पाकिस्तानच्या जमखेवर मीठ चोळणारा ठरला.
झिम्बावेचा लढवय्येपणा, मॅचचा लेखाजोखा...!
झिम्बावेने नाणेफेक जिंकून फलंदाजीचा निर्णय घेतला. कर्णधार क्रेग इर्विन (१९ धावा) आणि वेस्ली माधवेरे (१७ धावा) यांनी पहिल्या विकेटसाठी ४२ धावांची भागीदारी करुन संघाला समाधानकार सुरुवात करुन दिली. ही भागीदारी रौफने संपुष्टात आणली. रौफच्या वेगवान चेंडूवर इर्विन जोराचा फटका मारण्याच्या प्रयत्नात मोहम्मद वसीमकडे झेल देऊन तंबूत परतला. पुढच्या दोन चेंडूंनंतर माधेवेरेही पॅव्हेलियनमध्ये पोहोचला, त्याला मोहम्मद वसीमने पायचित केले. नंतर मिल्टन शुम्बानेही खराब परफॉर्मन्स दिला. शादाबच्या गोलंदाजीवर सोपा झेल देऊन तो बाद झाला.
यानंतर शॉन विल्यम्स (३१ धावा) आणि सिकंदर रझा (०९) यांनी चौथ्या विकेटसाठी ३१ धावा जोडून डाव सांभाळण्याचा प्रयत्न केला, मात्र शादाबने १४ व्या षटकात दुहेरी धक्का देत झिम्बावेला बॅकफूटवर ढकलले. शादाबने आधी विल्यम्स आणि नंतर रेगिस चकाबवाला बाद केले. पुढच्याच षटकात वसीमने सिकंदर रझा आणि ल्यूक जोंगवेलाही तंबूत पाठवले. नंतर ब्रॅड इव्हान्स आणि रायन बर्ले यांनी उपयुक्त योगदान दिले, ज्यामुळे झिम्बावेचा संघ ८ गडी गमावून १३० धावा करू शकला. इव्हान्सने १५ चेंडूत १९ धावा केल्या, तर रायन बर्ले १० धावांवर नाबाद राहिला.
पाकिस्तानकडून वेगवान गोलंदाज मोहम्मद वसीमने २४ धावांत ४ बळी घेतले. दुसरीकडे फिरकी गोलंदाज शादाब खानने २३ धावा देत ३ बळी घेतले. हारिस रौफनेही टी ट्वेन्टीमध्ये सर्वोत्तम कामगिरी करत ४ षटकात एक षटक मेडन टाकत केवळ १२ धावा दिल्या आणि १ विकेट घेतली.