तमिळनाडू अंतिम फेरीत

नवी दिल्ली : गोलंदाजांचा प्रभावी मारा अन् त्यानंतर दिनेश कार्तिक आणि कर्णधार विजय शंकरच्या अर्धशतकांमुळे तमिळनाडूने विजय हजारे ट्रॉफी क्रिकेट स्पर्धेत बडोद्यावर ६ विकेट्सनी मात करून अंतिम फेरीत प्रवेश केला. तमिळनाडूने ही स्पर्धा यापूर्वी चारवेळा जिंकली आहे. पण २००९-१०नंतर या संघाने प्रथमच अंतिम फेरीत प्रवेश केला.

फिरोझ शाह कोटला मैदानावर झालेल्या या लढतीत बडोद्याचा डाव ४९.३ षटकांत २१९ धावांत आटोपला. बडोद्याच्या केदार देवधर आणि आदित्य वाघमोडे यांनी ९२ धावांची सलामी दिली होती. मात्र, या चांगल्या सुरुवातीचा फायदा बडोद्याला घेता आला नाही. ही जोडी बाद झाल्यानंतर मधल्या फळीने निराशा केली. बडोद्याचा निम्मा संघ १३८ धावांत माघारी परतला होता. कर्णधार इरफान पठाण आणि पिनल शाह यांनी अनुक्रमे २७ आणि ३६ धावांची भर घातली. त्यामुळे बडोद्याला किमान दोनशे धावांचा टप्पा तरी ओलांडता आला. बडोद्याने अखेरच्या चार विकेट सात धावांत गमावल्या.

लक्ष्याचा पाठलाग करताना तमिळनाडूचे आघाडीचे तीन फलंदाज ९५ धावांत माघारी परतले होते. यानंतर कार्तिक-शंकर जोडीने चौथ्या विकेटसाठी ८८ धावांची भागीदारी केली. कार्तिक १०७ चेंडूंत ४ चौकारांसह ७७ धावा काढून बाद झाला. यानंतर शंकरने वाशिंग्टन सुंदरसह तमिळनाडूला १५ चेंडू राखून विजय मिळवून दिला. शंकरने ६७ चेंडूंत ४ चौकारांसह नाबाद ५३ धावा केल्या.

स्कोअरबोर्ड: बडोदा ४९.३ षटकांत २१९ (केदार देवधर ४६, आदित्य वाघमोडे ४५, पिनल शाह ३६, साई किशोर ४-५९, अश्विन क्रिस्ट २-२२, राहिल शाह २-३६, वॉशिंग्टन सुंदर २-२०) पराभूत वि. तमिळनाडू – ४७.३ षटकांत ४ बाद २२० (दिनेश कार्तिक ७७, विजय शंकर नाबाद ५३, वॉशिंग्टन सुंदर नाबाद २६, अतित शेठ ३-३६).