​कुंबळेशिवाय टीम इंडिया वेस्ट इंडिजला रवाना

मटा ऑनलाइन वृत्त । नवी दिल्ली

कर्णधार विराट कोहलीच्या नेतृत्वाखालील भारतीय संघ वेस्ट इंडिजला रवाना झाला आहे. भारतीय संघाचा कोच अनिल कुंबळे संघासोबत न गेल्याने कुंबळे आणि विराट यांच्यातील कटूता पुन्हा एकदा समोर आली आहे.

चॅम्पियन्स ट्रॉफीच्या फायनल सामन्यात पाकिस्तान संघाकडून भारताचा दारुण पराभव झाला आहे. भारतीय कोच अनिल कुंबळे यांचा एक वर्षाचा करार संपला असून त्यांना वेस्ट इंडिज दौऱ्यासाठी कोच म्हणून कायम ठेवले असल्याचे बीसीसीआयकडून स्पष्ट करण्यात आले आहे. लंडनहून वेस्ट इंडिज दौऱ्यासाठी भारतीय संघ रवाना झाला परंतु कोच अनिल कुंबळे हे २३ जूननंतर वेस्ट इंडिजला जाणार आहेत. २२ आणि २३ जून रोजी लंडनमध्ये आयसीसीची एक बैठक होणार असून या बैठकीत आपल्याला सहभागी व्हायचे असल्याने आपण भारतीय संघासोबत वेस्ट इंडिजला जाऊ शकलो नाही, असे अनिल कुंबळे यांनी सांगितले.

आयसीसीच्या बैठकीत सहभागी झाल्यानंतर आपण वेस्ट इंडिजला जाणार आहोत, असे अनिल कुंबळे यांनी स्पष्ट केले. २३ जूनपासून सुरू होणाऱ्या वेस्ट इंडिज मालिकेत ५ वनडे आणि एक टी-२० सामना खेळवला जाणार आहे. चॅम्पियन्स ट्रॉफीच्या फायनलमध्ये पाकिस्तानकडून दारुण पराभव पत्कारावा लागल्यानंतर कोच अनिल कुंबळे आणि कर्णधार विराट कोहली यांच्यात पुन्हा कटूता आली असल्याचे सूत्रांनी सांगितले.