‘त्या’ कसोटीपटूंना मिळणार ३५ लाख

वृत्तसंस्था, नवी दिल्ली

सुरुवातीला नकारघंटा वाजविणाऱ्या भारतीय क्रिकेट बोर्डाने अखेर प्रशासक समितीच्या निर्णयाचा स्वीकार करत १३ माजी क्रिकेटपटूंना प्रत्येकी ३५ लाख रुपये एकरकमी देण्याचे ठरविले आहे. या क्रिकेटपटूंमध्ये अतुल वासन आणि लालचंद राजपूत यांचा समावेश आहे. १९७०नंतर एक ते नऊ कसोटी खेळणाऱ्या क्रिकेटपटू या रकमेचे लाभार्थी ठरणार आहेत.

सोमवारी झालेल्या बैठकीत बोर्डाचे सचिव अमिताभ चौधरी यांनी प्रशासक समितीला आश्वस्त केले की, बोर्डाच्या २६ जूनला होत असलेल्या विशेष सर्वसाधारण सभेत या निर्णयावर शिक्कामोर्तब केले जाईल. चौधरी हे सध्या इंग्लंडमध्ये असून त्यांनी स्काइपवरून या बैठकीत हे आश्वासन दिले.

प्रशासक समितीने मार्चमध्ये माजी क्रिकेटपटूंना एकरकमी लाभ मिळावा असा निर्णय घेतला होता, पण बीसीसीआयच्या पदाधिकाऱ्यांना हा निर्णय पसंत पडला नव्हता. ही बोर्डाच्या अखत्यारितील बाब असून विनोद राय यांच्या अध्यक्षतेखालील प्रशासक समितीच्या अधिकारकक्षेत ते येत नाही, असे या पदाधिकाऱ्यांचे म्हणणे होते.

या निर्णयामुळे आता जे माजी खेळाडू याचे लाभार्थी ठरतील त्यांना प्रत्येकी ३५ लाख रु. मिळणार आहेत. अतुल वासन यांना ८० प्रथम श्रेणी क्रिकेट सामने खेळल्याबद्दल आधीच २५ लाख मिळाले आहेत. त्यामुळे त्यांना आता आणखी १० लाख रुपये देण्यात येतील. वासन यांनी ४ कसोटी व ९ वनडे क्रिकेटमध्ये भारताचे प्रतिनिधित्व केले होते.

बीसीसीआयकडून माजी खेळाडूंना निवृत्तीवेतनही देण्यात येते. त्यापलीकडे हा एकरकमी लाभ खेळाडूंना देण्यात येत आहे. सोमवारी झालेल्या बैठकीत असेही निश्चित करण्यात आले की, ज्या महिला खेळाडू एक ते चार कसोटी सामने खेळल्या आहेत त्यांना प्रतिमहिना १५ हजारांचे निवृत्तीवेतनही देण्यात येईल. ज्या महिला १० किंवा त्यापेक्षा अधिक कसोटी क्रिकेट खेळल्या आहेत, त्यांना २२५०० रु. निवृत्ती वेतन यापूर्वीच दिले जात आहे.