U१९ वर्ल्ड कप : पाकिस्तान उपांत्य फेरीत

वृत्तसंस्था, ख्राईस्टचर्च

महंमद मुसा आणि शाहीन शहा आफ्रिदीच्या अचूक गोलंदाजीनंतर अली झारयाब असिफच्या नाबाद अर्धशतकाच्या जोरावर पाकिस्तानने दक्षिण आफ्रिकेला तीन विकेटनी पराभूत करून १९ वर्षांखालील वन-डे वर्ल्ड कप क्रिकेट स्पर्धेच्या उपांत्य फेरीत प्रवेश केला.

प्रथम फलंदाजी करणाऱ्या दक्षिण आफ्रिका संघाला पाकिस्तानने ९ बाद १८९ धावांत रोखले. यात दक्षिण आफ्रिकेची एक वेळ ४ बाद ४३ अशी स्थिती झाली होती. मधल्या फळीतील माकवेतूने ६५ चेंडूंत ६० धावांची खेळी करून दक्षिण आफ्रिकेचा डाव सावरण्याचा प्रयत्न केला. त्याला निएमांदने चांगली साथ दिली. मात्र, ही जोडी फुटली आणि दक्षिण आफ्रिकेला दोनशे धावांचा टप्पाही ओलांडता आला नाही. यानंतर पाकिस्तानने विजयी लक्ष्य ४७.५ षटकांत ७ विकेटच्या मोबदल्यात पूर्ण केले. लक्ष्याचा पाठलाग करताना पाकिस्तानचे फलंदाजही ठराविक अंतराने बाद होत गेले. मात्र, असिफने एका बाजूने किल्ला लढविला आणि पाकिस्तानला विजय मिळवून दिला. असिफने १११ चेंडूंत ५ चौकारांसह नाबाद ७४ धावा केल्या. आता उपांत्य फेरीत भारत आणि बांगलादेश यांच्यातील विजेत्या संघाशी पाकिस्तानशी लढत होईल. पाकिस्तानने यापूर्वी दोन वेळा विजेतेपद मिळवले आहे.

पाकिस्तानसाठी लक्ष्य मोठे नव्हते. पण एक वेळ पाकिस्तानचा संघही अडचणीत आला होता. याबाबत पाकिस्तानचा कर्णधार हसन खान म्हणाला, 'यापेक्षा चांगल्या पद्धतीने आम्ही विजय मिळवू शकलो असतो. पण यातून नक्कीच योग्य तो धडा घेऊ. मुसा आणि शाहीनने अचूक मारा केल्या. यानंतर झारयाब भिंतीसारखा उभा राहिला. या कामगिरीत सातत्य राखण्याचा आमचा प्रयत्न असेल.'

संक्षिप्त धावफलक : दक्षिण आफ्रिका - ५० षटकांत ९ बाद १८९ (माकवेतू ६०, निएमांद ३६, डुप्लेसिस २१, महंमद मुसा ३-२९, आफ्रिदी २-३०) पराभूत वि. पाकिस्तान - ४७.५ षटकांत ७ बाद १९० (अली झारयाब असिफ नाबाद ७४, साद खान २६, रोहेल नाझीर २३, निएमांद २-३१, क्लार्क १-३३)