‘दुर्दैव... आमच्याकडे कोहली नाही!’

हैदराबादः आमचे दुर्दैव आहे की, आमच्या संघात विराट कोहली नाही! अन्यथा हैदराबादच्या पाटा खेळपट्टीवर आम्हाला पराभव टाळता आला असता, असे उदगार काढले आहेत ते बांगलादेशचा कर्णधार मुशफिकर रहीमने. कसोटी वाचवण्यासाठी फलंदाजीचे ‘मुलभूत तंत्र’ आवश्यक असते, या कोहलीच्या वक्तव्यावर मत नोंदवताना मुशफिकरने हे विचार मांडले.

‘कोहलीला अवगत आहे, तसे मुलभूत तंत्र आमच्यात असते तर आम्हीदेखील ५०प्लसच्या सरासरीने धावा केल्या असत्या. तसे झाले असते तर सामन्याच्या अखेरच्या दिवशी आम्हाला पराभव टाळण्यासाठी सात फलंदाजांची आवश्यकता भासलीच नसती. कोहलीसारखी कुवत असलेले चारच फलंदाज कसोटी वाचवण्यासाठी पुरेसे ठरले असते. आमचे दुर्दैव की कोहली आमच्या नव्हे प्रतिस्पर्धी संघात आहे’, असे मुशफिकर म्हणतो.

अपयशामुळे बांगलादेश क्रिकेट बोर्ड मुशफिकरकडून कर्णधारपदाची सुत्रे काढून घेण्याच्या विचारात असल्याचे म्हटले जाते आहे. मात्र यात तथ्य नसून आपणदेखील स्वतःहून पायउतार होणार नाही, असे तो स्पष्ट करतो.

मुशफिकर विरुद्ध शकिब

‘शकिब अल हसन हा सीनियर संघात आहे याचा अर्थ मी तैजुल इस्लाम व मेहेदी हसन मिराझ या तरुण खेळाडूंना गोलंदाजी द्यायची नाही असा होत नाही. मिराझ व तैजुल सरस मारा करत होते. खेळपट्टीकडून मिळणाऱ्या थोड्याफार मदतीचा ते फायदा उठवण्याचा प्रयत्न करत होते’, असे बांगलादेशचा कर्णधार मुशफिकर म्हणाला. यातून त्याचे व शकिबचे फारसे पटत नसल्याचे दिसून आले.

फलंदाजीबाबतही त्याने शकिबवर टीकाच केली. ‘फक्त बचावात्मक पवित्र्याने कसोटी वाचवता येत नाही. शकिबने दुसऱ्या डावांत फलंदाजी करताना आक्रमणच केले नाही. अशी निरस फलंदाजी करत आपण प्रतिस्पर्ध्यांचा आत्मविश्वास वाढवतो’, असे मुशफिकर म्हणाला.