म. टा. प्रतिनिधी, औरंगाबाद
साई क्रिकेट अकादमीतर्फे आयोजित १४ वर्षांखालील मुलांच्या आंतर अकादमी क्रिकेट स्पर्धेत युनिव्हर्सल क्रिकेट अकादमीच्या संघाने विजेतेपद पटकावले.
गरवारे क्रीडा संकुलावर झालेल्या अंतिम लढतीत युनिव्हर्सल अकादमीने यजमान साई क्रिकेट अकादमीवर सुपर ओेव्हरपर्यंत रंगलेल्या सामन्यात दोन धावांनी विजय मिळवला. स्पर्धेत उत्कृष्ट कामगिरी करणारा युनिव्हर्सलचा संकेत पाटील मालिकावीर पुरस्काराचा मानकरी ठरला. स्पर्धेत उत्कृष्ट अष्टपैलू खेळाडू म्हणून साई अकादमीच्या आर्यन शेजुळला गौरवण्यात आले.
अंतिम लढतीत नाणेफेक जिंकून प्रथम फलंदाजी करताना साई अकादमीने १५ षटकांत सहा बाद १२० धावा काढल्या. त्यात आर्यन शेजुळने नाबाद अर्धशतक झळकावले. त्याने १२ चौकार आणि १ षटकार खेचत नाबाद ८७ धावा काढल्या. त्याने एकाकी लढत देत संघाचा डाव सावरत संघाला शंभरी गाठून दिली. मधल्या फळीतील फलंदाजांनी निराशा केली. युनिव्हर्सलच्या गोलंदाजांनी अचूक गोलंदाजी करीत त्यांना रोखून धरले. आदित्य टाकने ११ धावा काढल्या. युनिव्हर्सलतर्फे साई चौधरी, आकाश वाघमारे, तनुजा साळुंके आणि संकेत पाटील यांनी प्रत्येकी एकेक गडी बाद केला.
प्रत्युत्तरात युनिव्हर्सल अकादमीने १५ षटकांत ७ बाद १२० धावा करत सामना बरोबरी राखला. यात संकेत पाटीलने ४६ धावा केल्या. अष्टपैलू आकाश वाघमारेने ३१ धावांची उपयोगी खेळी केली. त्याने तीन चौकार आणि दोन षटकार खेचले. त्याला साई चौधरीने चांगली साथ दिली. साईने अखेरच्या षटकांत येवून फटकेबाजी करत संघाला सामना बरोबरी ठेवण्यासाठी महत्त्वाचे योगदान दिले. साई चौधरीने ४ चौकारांच्या मदतीने २१ धावा फटाकावल्या. साई अकादमीकडून आर्यन शेजूळ आणि श्रीनिवास बावणे यांनी प्रत्येकी २ गडी बाद केले. त्यानंतर सामन्याच्या निकालासाठी सुपर ओव्हर खेळवण्यात आली.
साई, आकाश चमकले
अंतिम सामन्यात सुपर ओव्हरमध्ये साई चौधरी आणि आकाश वाघमारेच्या फलंदाजीच्या बळावर युनिव्हर्सल अकादमीने बाजी मारली. प्रथम फलंदाजी करताना युनिव्हर्सलने एक बाद १२ धावा केल्या. साई चौधरीने दोन चेंडूत एक चौकारासह सहा धावा केल्या. आकाश वाघमारेने तीन चेंडूत एक चौकारासह पाच धावा आणि संकेत पाटीलने एका धावेचे योगदान दिले. प्रत्युत्तरात साई अकादमीचा संघ केवळ दहा धावा करू शकला. युनिव्हर्सलच्या तनुज साळूंकेने प्रभावी गोलंदाजी केली.