कोहली गर्विष्ठ आणि अतिआक्रमकः सिमन्स

मटा ऑनलाइन वृत्त । नवी दिल्ली

टीम इंडियाचं 'रन-मशीन' आणि यंदाच्या आयपीएलमध्येही धावांचा पाऊस पाडून दिग्गजांचीही दाद मिळवणारा विराट कोहली अत्यंत गर्विष्ठ आणि अतिआक्रमक खेळाडू असल्याची टिप्पणी वेस्ट इंडिजचा स्टार फलंदाज लिंडल सिमन्सनं केली आहे.

टी-२० वर्ल्ड कपच्या उपांत्य सामन्यात कोहली मला सतत डिवचत होता, चिथावणी देत होता. त्यातूनच मला बेधडक खेळी करायची प्रेरणा मिळाली आणि ८२ धावांची खेळी करून मी माझी ताकद त्याला दाखवून दिली, असंही सिमन्सनं नमूद केलंय.

यंदाच्या वर्ल्ड टी-२० मध्ये भारताचं आव्हान सेमी फायनलमध्येच संपुष्टात आलं होतं. विंडिजनं टीम इंडियाकडून विजयाचा घास हिरावून घेतला होता आणि लिंडल सिमन्सचा त्यात मोलाचा वाटा होता. २ बाद १९ अशा अडचणीत सापडलेल्या विंडिजला सिमन्सनं नुसतं सावरलंच नाही, तर शेवटपर्यंत किल्ला लढवत जिंकवूनच दिलं होतं. ८२ धावांच्या त्यांच्या झुंजार खेळीपुढे विराट कोहलीच्या ८९ धावा झाकोळल्या गेल्या होत्या. या आपल्या खेळीबद्दल बोलताना, सिमन्सनं विराट कोहलीच्या वागण्या-बोलण्यावर टिप्पणी केली आहे.

विराट हा अत्यंत गर्विष्ठ खेळाडू आहे. मैदानावर असताना तो खूपच आक्रमक होतो. त्या दिवशी मी मैदानावर उतरल्यापासून तो मला चिथावणी देत होता. तेव्हाच आपली ताकद दाखवून द्यायचं मी नक्की केलं होतं. तू एकटाच चांगला फलंदाज नाहीस, हे मी सिद्ध करून दाखवेन, असं मी मनाशी पक्कं ठरवलं होतं. त्या निर्धारानंच मी खेळलो, अशी आठवण लिंडल सिमन्सनं सांगितली. कोहलीच्या चिथावणीनंच एका अर्थी मला चांगलं खेळण्याची प्रेरणा मिळाली, असं तो म्हणाला.

दरम्यान, जुलै-ऑगस्ट महिन्यात टीम इंडिया कसोटी मालिकेसाठी विंडिज दौऱ्यावर जात असून संघाच्या नेतृत्वाची धुरा विराट कोहलीकडेच आहे. त्यावेळी मैदानावर कोहली-सिमन्स आमनेसामने येतील. त्यांच्यातील 'पंगा' क्रिकेटचाहत्यांसाठी नक्कीच रंजक ठरेल.