'विराट म्हणजे सचिन व रिचर्ड्सचे मिश्रण'

मटा ऑनलाइन वृत्त । नवी दिल्ली

क्रिकेटच्या मैदानावर दिवसागणिक आणि सामन्यागणिक धावांचा रतीब घालणारा भारताचा धडाकेबाज फलंदाज विराट कोहली याची ब्रॅण्ड व्हॅल्यू प्रचंड वाढली आहे. सध्या कोहलीची ब्रॅण्ड व्हॅल्यू साडेपाचशे कोटींवर पोहोचली असून अभिनेता शाहरुख खाननंतर इतकी ब्रॅण्ड व्हॅल्यू असलेला तो दुसरा भारतीय ठरला आहे.

क्रिकेटचं मैदान गाजवणाऱ्या विराटला जाहिरात विश्वातून आधीपासूनच तुफान मागणी होती. मात्र, भारतीय संघाच्या कर्णधारपदी आल्यानंतर त्याच्या ब्रॅण्ड व्हॅल्यूनं तब्बल २० ते २५ टक्क्यांनी उसळी घेतली आहे. बॉलिवूडचा सध्याचा सुपरस्टार शाहरुख खान याची ब्रॅण्ड व्हॅल्यू सध्या सर्वाधिक असून त्याच्या करारनाम्याचं मूल्य ६०० कोटींहून अधिक असल्याचं बोललं जातं. विराट कोहली सध्या २० वेगवेगळ्या कंपन्यांच्या उत्पादनांसाठी ब्रॅण्ड अॅम्बेसिडर आहे. मैदानावरील त्याचा फॉर्म कायम राहिल्यास विराट लवकरच शाहरुखला मागे टाकून सर्वाधिक पैसे कमावणारा ब्रॅण्ड अॅम्बेसिडर ठरू शकतो, असा अंदाज कॉर्पोरेट क्षेत्रातील तज्ज्ञांनी वर्तवला आहे.

विराट लवकर म्हातारा होऊ शकतो!: कपिल

भारतीय क्रिकेट संघाचा कर्णधार विराट कोहली हा विव्ह रिचर्ड्स आणि सचिन तेंडुलकर यांचे मिश्रण असल्याचं कपिल देव यांनी म्हटलं आहे. 'कोहली फलंदाजी करत असताना त्याची देहबोली जबरदस्त सकारात्मक असते. चौकार ठोकल्यानंतर ‘जा चेंडू घेऊन ये’ अशा आविर्भावात तो गोलंदाजाकडे पाहत असतो. विराट मुंबईच्या पठडीतला फलंदाज नाही. चौकार ठोकल्यानंतर गोलंदाजाकडं न बघायचं नाही. अन्यथा त्याला राग येईल आणि तो तुमची विकेट घेऊ शकतो, असं मुंबईकर क्रिकेटपटूंना शिकवलं जात असल्याचं कपिल म्हणाले.

कपिल यांनी विराटला अकाली वृद्धत्व येण्याची भीती व्यक्त केली. सततच्या खेळण्यामुळं आणि जास्तीत जास्त व्यायामामुळं तो लवकर म्हातारा होण्याची शक्यता त्यांनी वर्तवली. ‘कसून मेहनत घेतल्यामुळं माणसाचे स्नायू लवकर थकण्याची शक्यता असते. अधिक व्यायाम केल्यामुळं खेळाडू दुखापतग्रस्त होण्याची भीती असते. त्यामुळंच विराटबाबत मला अशी भीती मला वाटत असल्याचं कपिल यांनी नमूद केलं.