सचिन तेंडुलकरचा 'हा' विक्रम विराटनं मोडला

मटा ऑनलाइन वृत्त | मुंबई

सध्या यशोशिखरावर असलेला भारतीय क्रिकेट संघाचा कर्णधार विराट कोहली नवनवीन विक्रमांना गवसणी घालत आहे. आयसीसीच्या एकदिवसीय फलंदाजांच्या क्रमवारीत त्याने ८८९ गुणांसह पहिल्या स्थानी झेप घेतली आहे. गुणांच्या कमाईत त्याने महान फलंदाज सचिन तेंडुलकरलाही (८८७ गुण) मागे टाकले आहे.

विराट एकदिवसीय क्रमवारीत दुसऱ्या क्रमांकावर होता. अवघ्या दहा दिवसांत त्याने पुन्हा पहिल्या क्रमांकावर झेप घेत दक्षिण आफ्रिकेच्या एबी 'डी' व्हिलियर्सला मागे टाकले आहे. विराटच्या नेतृत्वाखालील भारतीय संघाने न्यूझीलंडविरुद्ध २-१ ने मालिका जिंकली. या मालिकेत विराटने २६३ धावा केल्या. या कामगिरीमुळे ८८९ गुणांसह तो अव्वल स्थानी पोहोचला. आयसीसी क्रमवारीत सर्वाधिक गुणांची कमाई करून त्याने भारताकडून खेळताना सर्वोच्च कामगिरीची नोंद केली आहे. सचिनने १९९८ मध्ये आयसीसी क्रमवारीत ८८७ गुणांची कमाई केली होती. त्याचा हा विक्रम विराटने मोडला आहे.

दरम्यान, आयसीसीच्या क्रमवारीत पहिल्या दहामध्ये रोहित शर्माने स्थान पटकावले आहे. तो ७९९ गुणांसह सातव्या क्रमांकावर आहे. न्यूझीलंडविरुद्धच्या तीन सामन्यांच्या मालिकेत त्याने १७४ धावा केल्या. याशिवाय माजी कर्णधार महेंद्रसिंग धोनी अकराव्या स्थानी आहे. आयसीसीच्या गोलंदाजांच्या यादीत जसप्रीत बुमराहने तिसऱ्या स्थानी झेप घेतली आहे. पाकिस्तानचा हसन अली पहिल्या, तर दक्षिण आफ्रिकेचा इम्रान ताहीर दुसऱ्या स्थानावर आहे.