कोहली अव्वलच

नवी दिल्लीः भारतीय संघाचा कर्णधार विराट कोहलीने आयसीसी वनडे रँकिंगमधील फलंदाजांच्या क्रमवारीतील अव्वल क्रमांक कायम राखला आहे. अव्वल १५मधील इतर भारतीय आहेतः धोनी १२वा क्रमांक, धवन १३ आणि रोहित शर्मा १४वा क्रमांक.

श्रीलंकेविरुद्धच्या मालिकेत धावांची टाकसाळ उघडत आपल्या रँकिंग पॉईंट्समध्ये १२ गुणांची भर घालण्याची संधी कोहलीला आहे. तसे झाल्यास त्याच्या आणि दुसऱ्या क्रमांकावरील डेव्हिड वॉर्नरच्या गुणांमधील फरक वाढेल.

कोहलीचे गुण ८७३ आहेत. श्रीलंकेविरुद्धच्या पाच वनडेंच्या मालिकेला रविवारी दम्बुला वनडेने सुरुवात होते आहे. गोलंदाजांच्या रँकिंगमध्ये भुवनेश्वरकुमार १३व्या क्रमांकावर आहे. गोलंदाजांच्या रँकिंगमधील अव्वल पंधरामध्ये फक्त भुवनेश्वर हा एकच गोलंदाज आहे.

वनडे संघांच्या रँकिंगमध्ये भारतीय संघ सध्या तिसऱ्या क्रमांकावर आहे. हा क्रमांक कायम राखण्यासाठी भारताला श्रीलंकेविरुद्धची वनडे मालिका किमान ४-१ अशी तरी जिंकावी लागेल. भारताने मालिका ३-२ अशी जरी जिंकली तरी भारताच्या सध्याच्या (११४)रँकिंग गुणांमधून एक गुण कमी होईल (११३). ज्यामुळे भारताला आपला क्रमांक गमवावा लागू शकतो. जे इंग्लंडच्या पथ्यावर पडेल.

तर श्रीलंका पात्रता फेरीत

१)सर्वात मोठी पंचाईत झाली आहे ती श्रीलंकेची. २०१९च्या वर्ल्डकपमध्ये थेट प्रवेश मिळवायचा असेल तर त्यांना या मालिकेत किमान दोन वनडे तरी जिंकाव्या लागतील.

२)श्रीलंकेला दोन वनडेदेखील जिंकता आल्या नाहीत, तर १९९६मध्ये वर्ल्डकप जिंकणाऱ्या या संघाला पुढील वनडे वर्ल्डकपसाठी प्राथमिक फेरीत खेळावे लागेल. रँकिंग गुण सुधारण्यासाठी श्रीलंकेकडे ३० सप्टेंबरपर्यंतचा कालावधी आहे. सध्या श्रीलंकेच्या खात्यात ८८ गुण आहेत. त्यांच्या खालोखाल विंडीज संघ आहे. या दोघांमध्ये दहा गुणांचा फरक आहे.

३)३० सप्टेंबर ही रँकिंगचा निकष बघण्याची अखेरची तारीख आहे. त्यानंतर यजमान इंग्लंडसह अव्वल सात जणांना वर्ल्डकपमध्ये थेट प्रवेश मिळेल.