वन-डेत विराटच नंबर वन

मटा ऑनलाइन वृत्त । दुबई

आयसीसीने आज जाहीर केलेल्या वन-डे क्रमवारीत फलंदाजांमध्ये टीम इंडियाचा कर्णधार विराट कोहलीने आपलं पहिलं स्थान कायम राखलं आहे. कोहलीनंतर डेव्हिड वॉर्नर (ऑस्ट्रेलिया), एबी डिव्हिलियर्स (दक्षिण आफ्रिका), जो रूट (इंग्लंड), बाबर आझम (पाकिस्तान) यांनी पहिल्या पाच जणांमध्ये स्थान मिळवलं आहे.

वेस्ट इंडिजविरुद्धच्या वन-डे मालिकेत १५४ धावा करणारा भारताचा माजी कर्णधार महेंद्रसिंग धोनी फलंदाजांच्या यादीत बाराव्या स्थानी आहे. त्याने १५वरून १२व्या स्थानी मजल मारली. मालिकेत सर्वाधिक ३३६ धावा करणाऱ्या अजिंक्य रहाणेने १३ पायऱ्या वर झेप घेत आपल्या कारकीर्दीतील सर्वोत्तम २३वं स्थान मिळवलं आहे.

गोलदांजी आणि अष्टपैलू कामगिरीचा विचार केल्यास पहिल्या दहामध्ये एकही भारतीय खेळाडू स्थान मिळवू शकलेला नाही. गोलंदाजीत ऑस्ट्रेलियाचा जोश हेजलवूड पहिल्या तर अष्टपैलू कामगिरीत बांगलादेशचा साकीब अल हसन पहिल्या स्थानी आहे. भारताचा विचार केल्यास गोलंदाजी क्रमवारीत भुवनेश्वर कुमार १३व्या तर रविचंद्रन अश्विन २०व्या स्थानी आहे. अष्टपैलू खेळाडूंत भारताकडून हार्दिक पंड्याने २२ पायऱ्या वर चढत २६व्या स्थानी झेप घेतली आहे.