...आणि विराट कोहलीने मैदान सोडले!

मटा ऑनलाइन वृत्त । रांची

भारत आणि ऑस्ट्रेलिया दरम्यान रांची येथे सुरू असलेल्या तिसऱ्या कसोटी सामन्यातून कर्णधार विराट कोहलीला अचानक मैदानाबाहेर जावे लागले. चेंडू अडवताना खांद्याला दुखापत झाल्याने त्याला मैदान सोडावे लागले. त्यामुळे भारतीय संघाच्या कर्णधारपदाची तात्पूरती धुरा अजिंक्य रहाणेकडे सोपविण्यात आली आहे.

लंच ब्रेकनंतर खेळ सुरू झाल्यावर पीटर हँड्सकॉम्बने रविंद्र जडेजाच्या चेंडूवर एक सणसणीत चौकार लगावला. हा चौकार अडविण्यासाठी कोहलीने चेंडूचा पाठलाग केला. यावेळी त्याने चेंडू अडविण्यासाठी उंच उडी मारली असता खाली पडताना त्याचा डावा खांदा जमीनीवर जोरदार आदळला. त्यामुळे खांदा दुखू लागल्याने त्याला मैदान सोडावे लागले. परिणामी कोहलीच्या अनुपस्थितीत संघाचा उपकर्णधार रहाणेकडे कर्णधारपदाची धुरा सोपविण्यात आली.