‘विराट कोहली व्हायचेय मला’

लाहोर : विराट कोहली आणि माझी फलंदाजीची शैली भिन्न असली, तरी विराटने भारतीय संघासाठी जशी कामगिरी केली आहे तशी कामगिरी करण्याचे माझे ध्येय आहे, असे पाकिस्तानचा क्रिकेटपटू बाबर आझमने सांगितले आहे. सध्या वनडे क्रिकेट मालिकेसाठी वेस्ट इंडिजच्या दौऱ्यावर असलेल्या पाकिस्तान संघामध्ये बाबरचा समावेश आहे. २२ वर्षीय बाबरने आतापर्यंत २३ आंतरराष्ट्रीय वनडे सामन्यांत ५३ च्या सरासरीने धावा केल्या असून त्यामध्ये चार शतकांचा समावेश आहे. पाकचे प्रशिक्षक मिकी आर्थर यांनीही बाबरच्या गुणवत्तेची तुलना विराटशी केली आहे.

रॉसवेल-शँड निवृत्त

लंडन : ऑलिम्पिकमध्ये दोनवेळा सुवर्णपदक पटकावणारी ब्रिटनची धावपटू जोआन्ना रॉसवेल-शँड हिने मंगळवारी निवृत्तीचा निर्णय जाहीर केला. २८ वर्षीय जोआन्नाने २०१२ लंडन ऑलिम्पिक व २०१६ रिओ ऑलिम्पिकमध्ये सांघिक गटात सुवर्णपदकाची कमाई केली होती. त्याचप्रमाणे, २०१४ च्या जागतिक अजिंक्यपद स्पर्धेत तिने सांघिक व वैयक्तिक अशा दोन्ही गटांमध्ये सुवर्णपदक जिंकले होते. मागील दहा वर्षे मी ब्रिटिश सायकलिंग संघाचा एक भाग होते. या संघासोबत मला अनेक स्पर्धांमध्ये यश मिळवता आले. मला ही संधी दिल्याबद्दल ब्रिटन सायकलिंग संघटनेचे मी आभार मानू इच्छिते, असे जोआन्नाने म्हटले आहे.

अतिरिक्त फिरकीपटू

जोहान्सबर्ग : न्यूझीलंडविरुद्ध सुरू असलेल्या कसोटी मालिकेतील तिसऱ्या व अखेरच्या सामन्यासाठी मंगळवारी दक्षिण आफ्रिकेचा संघ जाहीर करण्यात आला असून या संघामध्ये डेन पिडिट या अतिरिक्त फिरकी गोलंदाजाला स्थान देण्यात आले आहे. या मालिकेतील अखेरचा कसोटी सामना २५ मार्चपासून हॅमिल्टन येथे रंगणार आहे. या मालिकेतील पहिल्या दोन सामन्यांसाठी दक्षिण आफ्रिका संघामध्ये केवळ केशव महाराज या एकाच फिरकीपटूचा समावेश करण्यात आला होता.

भारताकडे चार सल्लागार

नवी दिल्ली : हॉकी वर्ल्डकप, २०२० टोकियो ऑलिम्पिक यासारख्या आंतरराष्ट्रीय स्पर्धांमध्ये भारतीय संघाने चांगली कामगिरी करण्याच्या उद्देशाने हॉकी इंडियातर्फे ज्युनियर व सीनियर संघांसाठी चार ‘सायंटिफिक’ सल्लागार नेमण्याचा निर्णय घेतला आहे. ऑस्ट्रेलियाचे स्कॉट कॉनवे हे सीनियर पुरुष संघाचे सल्लागार असतील, तर दक्षिण आफ्रिकेचे रॉबिन अँथनी वेबस्टर आर्केल हे ज्युनियर पुरुष संघाचे सल्लागार म्हणून काम पाहतील. आफ्रिकेचेच वेन पॅट्रिक लोम्बार्ड हे महिला संघाचे सल्लागार असून ते भोपाळ येथील प्रशिक्षण शिबिरामध्ये काम पाहतील. ऑस्ट्रेलियाच्या डॅनिएल बॅरी यांची ज्युनियर महिला संघाचे सल्लागार म्हणून नेमणूक करण्यात आली आहे.