झहीर खानप्रमाणे कामगिरी करायची आहेः खलील

नवी दिल्लीः भारतीय संघाचा माजी जलदगती गोलंदाज झहीर खानप्रमाणे भारतीय संघात कामगिरी करायची आहे, असे भारतीय संघाचा जलदगती गोलंदाज खलील अहमद याने म्हटले आहे. तो एका मुलाखतीदरम्यान बोलत होता.

झहीर खान माझा आदर्श आहे. त्याने भारतीय संघात राहून जशी कामगिरी केली, तशी कामगिरी करणे माझे स्वप्न आहे. झहीर भाई सामन्याची सुरुवात करताना वेगळ्या प्रकरचा उत्साह आणि उत्तेजन मिळत असे. खेळाची ती उंची मला गाठायची आहे, असेही खलील याने नमूद केले.

झहीर खान यांनी जितकी वर्ष संघासाठी खेळला, तितकी वर्ष मला संघात खेळायला आवडेल. मी अडचणीत असलो की, झहीर भाईला फोन करतो. तो माझ्यासाठी नेहमी उपलब्ध असतो, असे खलील म्हणाला. भारतीय संघाकडून मला थ्री स्टार असलेली जर्सी दिली आहे. संघाने माझ्यावर टाकलेला विश्वास मला सार्थ ठरवायचा आहे आणि त्यासाठी कठोर मेहनत घेण्याची, त्याग करण्याची माझी तयारी आहे, असा निर्धार खलील याने यावेळी व्यक्त केला.

कर्णधार तुमच्याकडे येऊन तुम्हाला प्रोत्साहन देतो; तुमचे कौतुक करतो, तेव्हा छान वाटतं. माझ्याकडून जेवढी होईल, तेवढी देशसेवा करायची आहे, असे खलीलने सांगितले. विश्वचषक स्पर्धेतील संघासाठी माझी निवड झाली नाही, त्याचे मला वाईट वाटले नाही. विश्वचषकासारख्या स्पर्धेत संघाचे नेतृत्व करण्यासाठी जास्त तयारीची आवश्यकता आहे, असे मी स्वतःला समजावले. मी तरुण आहे आणि माझा मार्ग इथे संपत नाही. मला अद्याप मोठा पल्ला गाठायचा आहे, असे खलीलने नमूद केले.

कर्णधार विराट कोहली, रोहित शर्मा आणि शिखर धवन यांच्यासारख्या मोठ्या खेळाडूंसोबत खेळणे सुखद अनुभव आहे. जागतिक दर्जाच्या खेळाडूंसोबत खेळण्यासाठी तुम्हाला खूप मेहनत घ्यावी लागते. यामुळे खेळ सुधारण्यास मदत होते. चांगली कामगिरी केल्यानंतर दिवसाच्या शेवटी त्याचे समाधान मिळते, असे खलीलने सांगितले.

दरम्यान, डावखुरा जलदगती गोलंदाज २१ वर्षीय खलील अहमदने सप्टेंबर २०१८ मध्ये भारतीय संघासाठी पहिला सामना खेळला होता. यानंतर त्याने भारताकडून ८ एकदिवसीय आणि ११ टी-२० सामने खेळले आहेत.