'द्विधा मनस्थितीत असतो तेव्हा धोनीकडे धाव घेतो'

नवी दिल्ली:

आपल्या फिरकीने भल्या भल्या फलंदाजांना घाम फोडणाऱ्या युजवेंद्र चहलने क्रिकेटपटू महेंद्रसिंह धोनीचं तोंडभरून कौतुक केलं आहे. 'मॅचच्यावेळी जेव्हाही मी द्विधा मनस्थितीत असतो, तेव्हा धोनीकडे धाव घेऊन त्याचा सल्ला घेतो. विशेष म्हणजे मी द्विधा मनस्थितीत असल्याचं धोनीलाही कळतं. मीच काय संघातील कोणताही खेळाडू अडचणीत असेल तर धोनी धावून जातो आणि त्यांना मदत करतो', अशा शब्दात चहलने धोनीची स्तुती केली आहे.

संघामध्ये एखादा ज्येष्ठ खेळाडू असणं नेहमीच फायद्याचं असतं. मग तो संघाचा कर्णधारच असला पाहिजे असं नाही. मात्र ज्येष्ठ खेळाडूच्या अनुभवाचा नेहमीच फायदा होतो. कर्णधार विराट कोहली सुद्धा आपल्या या ज्येष्ठ खेळाडूंकडून नेहमी सल्ला घेत असतो. सध्या या ज्येष्ठ खेळाडूच्या भूमकेत महेंद्रसिंह धोनी असल्याचं चहलने सांगितलं. 'विकेटच्यापाठी असलेल्या गोलंदाजाची बॉडी लँग्वेज पाहूनही त्या गोलंदाजाला काय अडचण आहे, हे धोनी सांगू शकतो. तो मलाच नाही तर इतर गोलंदाजांनाही नेहमीच मदत करतो', असंही चहल म्हणाला.

नुकत्याच पार पडलेल्या आशिया कप दरम्यान पाकिस्तानविरोधातील सामन्यावेळी धोनीबरोबरचा एक किस्साही त्यानं सांगितला. 'या मॅचच्यावेळी रोहित शर्मा कर्णधार होता. धोनीशी चर्चा केल्यानंतर रोहित माझ्याकडे आला आणि मला पॉवर प्लेमध्ये गोलंदाजी करायला सांगितली. मी धोनीकडे पाहिलं. धोनी लगेचच माझ्याकडे धावत आला आणि मला स्टम्प टू स्टम्प गोलंदाजी करायला सांगितली. मी तेच केलं. त्यामुळे इमाम उल हक पायचीत बाद झाला', अशी आठवणही त्यानं सांगितली. यावेळी त्याने विराट कोहलीचीही स्तुती केली. विराट ग्रेट कर्णधार आहे. पण त्यालाही कधी अडचण आली तर तो धोनीचा सल्ला घेतो. त्यामुळे संघालाच फायदा होतो. मात्र चुका केल्यावर धोनी अनेकदा ओरडतोही अशी प्रेमळ तक्रारही त्यानं केली. धोनी, विराट आणि रोहित शर्मा या तिघांची स्टाइल वेगळी आहे. त्यामुळे त्यांची तुलना करता येणं शक्य नसल्याची पुस्तीही त्यानं जोडली.