बेंगळुरू : विस्डेन इंडिया अल्मनॅकच्या सहाव्या आवृत्तीमध्ये वर्षातील सर्वोत्कृष्ट खेळाडू म्हणून भारताच्या लोकेश राहुलची निवड करण्यात आली आहे. या नियतकालिकाच्या मुखपृष्ठावर भारतीय महिला क्रिकेट संघाचे वर्ल्ड कपदरम्यान जल्लोष करतानाचे छायाचित्र वापरून त्यांचा गौरव करण्यात आला आहे. भारताचा कर्णधार विराट कोहलीला नियतकालिकाने सर्वांत यशस्वी भारतीय आणि आंतरराष्ट्रीय खेळाडू म्हणून गौरवले आहे. कोहली हा आता विक्रमांची नोंद करणाऱ्यांचा आवडता खेळाडू बनला आहे. परंतु, या वर्षी होणाऱ्या इंग्लंड व ऑस्ट्रेलिया दौऱ्यामध्ये तो यशस्वी कामगिरी करू शकला, तर इतिहासात त्याला विशेष स्थान प्राप्त होईल, असे सुरेश मेनन यांनी या अंकाच्या संपादकीयमध्ये म्हटले आहे. महिला क्रिकेटमध्ये भारताच्या दीप्ती शर्माचा समावेश वर्षातील सर्वोत्कृष्ट क्रिकेटपटूंमध्ये करण्यात आला असून भारताच्या इरापल्ली प्रसन्ना आणि शांता रंगस्वामी या अनुक्रमे माजी पुरुष व महिला क्रिकेटपटूंचा समावेश विस्डेन इंडियाच्या 'हॉल ऑफ फेम'मध्ये करण्यात आला आहे.
