फिफा: ४५व्या वर्षी पदार्पण, बनले रेकॉर्ड

व्होल्गोग्राद

इजिप्तचा ४५ वर्षीय गोलकीपर एसाम एल हदारी हा फुटबॉल विश्वचषक स्पर्धेत खेळणारा सर्वात जास्त वय असलेला खेळाडू ठरला आहे. अल हदारीचं नाव सौदी अरेबियाविरुद्ध इजिप्त संघाच्या शेवटच्या लीग सामन्यात मैदानात उतरणाऱ्या सुरुवातीच्या ११ खेळाडूंच्या यादीत समाविष्ट होतं. इजिप्तनं ट्विट करत टीप लाइनअपबाबत माहिती दिली. यात अल हदारीच्या नावाचाही समावेश आहे.

२०१४ मध्ये ब्राझीलमध्ये पार पडलेल्या विश्वचषक स्पर्धेत कोलंबियाचा गोलकीपर फरीद मोंद्रागोन हा ४३ वर्षांचा होता. त्या स्पर्धेत तो सर्वाधिक वय असलेला खेळाडू होता. आता अल हदारी मोंद्रागोनचं रेकॉर्ड तोडणार आहे.

सर्वात लहान खेळाडू डेनियल अरजानी

ऑस्ट्रेलियाचा मिडफिल्डर डेनियल अरजानी हा या स्पर्धेत खेळणारा सर्वात कमी वयाचा खेळाडू आहे. तो १९.५ वर्षांचा आहे.

तसं पाहिलं तर, या स्पर्धेत २० वर्षांहून कमी वयाचे एकूण ७ खेळाडू आहेत. या वर्षी या स्पर्धेत भाग घेण्यासाठी रशियाला पोहोचलेल्या ७३६ खेळांडूंचं सरासरी वय २८ वर्षं आहे. स्पर्धेच्या इतिहासातील हे सर्वाधिक सरासरी वय आहे.

नायजेरिया सर्वात तरूण

संघांच्या सरासरी वयाचा विचार करता नायजेरिया संघ सर्वात तरूण आहे. तर, पनामा आणि कोस्टारिका सर्वात वयस्क संघ आहेत. नायजेरिया संघाचे सरासरी वय आहे २५.९ वर्षे. तर पनामा आणि कोस्टारिकाचे सरासरी वय आहे २९.६ वर्षे. विशेष म्हणजे पनामा संघ पहिल्यांदाच विश्वचषक स्पर्धेत भाग घेत आहे. सर्वात तरूण संघांमध्ये अँटॉनियो ग्रीजमॅनचा संघ फ्रान्स आणि हॅरी केनचा संघ इंग्लंड संयुक्तपणे दुसऱ्या स्थानी आहे. या दोन्ही संघांचे सरासरी वय २६ वर्षं आहे.