वृत्तसंस्था, एडिनबर्ग
राजकीय आघाड्यांबरोबरच अगदी फुटबॉल, रग्बीसारख्या खेळांमध्ये इंग्लंडशी वैरभाव असणाऱ्या ब्रिटनमधील स्कॉटलंड, वेल्स, उत्तर आयर्लंड या अन्य प्रदेशांनी फिफा फुटबॉल वर्ल्ड कपमध्ये इंग्लंडसाठी 'चिअरिंग' सुरू केले आहे.
ब्रिटनकडून फक्त ऑलिंपिकमध्येच एकसंध संघ पाठविण्यात येतो. अन्य स्पर्धांमध्ये इंग्लंड, स्कॉटलंड, वेल्स आणि उत्तर आयर्लंडचे स्वतंत्र संघ असतात. खेळाडू व अन्य स्रोत यांमुळे इंग्लंडची कामगिरी कायमच उजवी ठरते. त्यामुळे, या प्रदेशांकडून सर्वच स्पर्धांमध्ये इंग्लंडच्या विरोधात उत्साह असतो. अगदी, २००६च्या फुटबॉल वर्ल्ड कपमध्ये अँडी मरेने इंग्लंडच्या संघाला पाठिंबा देता येणार नाही, असे जाहीर केले होते. त्यामुळे त्याच्यावर जाहीर टीका झाली होती. या पार्श्वभूमीवर, ब्रिटनमधील वातावरणामध्ये होत असलेला बदल आश्चर्याचा धक्का देणारा आहे. स्कॉटिश नॅशनल पक्षाचे पहिले मंत्री निकोला स्टर्जिऑन यांनी वर्ल्ड कपच्या ट्रॉफीसह ट्विट केले असून, या विजेतेपदाचे आपण स्वप्न पाहू शकतो, अशा आशयाचे ट्विट त्यांनी केले आहे. उपांत्यपूर्व फेरीतील इंग्लंडच्या विजयाचे अभिनंदन करण्यासाठी त्यांनी हे ट्विट केले होते. याच पक्षाचे अन्य संसद सदस्य इआन ब्लॅकफोर्ड यांनीही इंग्लंडच्या संघाचे अभिनंदन केले आहे. मैत्रिपूर्ण लढतीतील आदरतिथ्यामुळे प्राथमिक फेरीमध्ये पेरुचे समर्थन करत होतो, असे सांगत ब्लॅकफोर्ड यांनी आता इंग्लंडच्या विजेतेपदासाठी शुभेच्छा दिल्या आहेत.
'हॅरी पॉटर'च्या लेखिका जे. के. रोलिंग यांनीही याच मुद्द्यावरून गेल्या आठवड्यात वाद निर्माण केला होता. एका पत्रकाराने केलेल्या इंग्रजविरोधी विधानावर त्यांनी टीका केली होती. रोलिंग या मूळच्या इंग्लंडच्या असून, आता त्या एडिनबर्गमध्ये वसल्या आहेत.
दरम्यान, इंग्लंडविरोधी भावना पूर्णपणे इतिहासजमा झालेला नाही, हेही वास्तव आहे. उपांत्य फेरीच्या सामन्यामध्ये क्रोएशियाचेच समर्थन करणार असल्याचे सांगत स्कॉटलंडमधील स्तंभलेखक कॅरोलिन लेकी यांनी 'एनिवन बट इंग्लंड' ही भूमिका कायम असल्याचे स्पष्ट केले.