जपानचा कोलंबियाला धक्का

वृत्तसंस्था, सारान्स्क

जपान संघाने नियोजनबद्ध खेळ करून फिफा फुटबॉल वर्ल्ड कपमध्ये मंगळवारी कोलंबिया संघाला २-१ अशा गोलफरकाने पराभवाचा धक्का दिला. जपानकडून या सामन्यात शिंझी कागावा आणि युका ओसाको यांनी गोल नोंदवले. कोलंबियातर्फे क्विंटेरोने एकमेव गोल नोंदवला. या विजयासह जपानने 'ग्रुप एच'मध्ये तीन गुणांसह आघाडी घेतली आहे. त्याचबरोबर जपान संघाने ओसाकाच्या भूकंपातून सावरणाऱ्या आपल्या देशबांधवांना एक आनंदवार्ताही दिली.

जागतिक क्रमवारीत कोलंबियाचा संघ १६ व्या, तर जपानचा संघ ६१ व्या स्थानावर आहे. त्यामुळे जपानने आपल्यापेक्षा वरचढ प्रतिस्पर्ध्यांचा पराभव करून यंदाच्या वर्ल्ड कपमधील आणखी एका धक्कादायक निकालाची नोंद केली. सामन्याच्या सुरुवातीच्या तिसऱ्याच मिनिटास कोलंबियाच्या कार्लोस सांचेझला जपानच्या शिंझी कागावाने मारलेला गोलकडे जाणारा चेंडू हाताने अडवल्याबद्दल रेड कार्ड देण्यात आले. त्यामुळे, कोलंबियाला उर्वरित संपूर्ण सामना दहा खेळाडूंसह खेळावा लागला. सांचेझच्या कृत्याची भरपाई म्हणून जपानला पेनल्टी किक बहाल करण्यात आली. या किकवर कागावाने चेंडू अचूकपणे गोलजाळ्यात धाडून सहाव्या मिनिटासच जपानला १-० अशी आघाडी मिळवून दिली.

पूर्वार्धात ३९ व्या मिनिटास कोलंबियाला मिळालेली फ्री-किक सत्कारणी लावत ज्युआन क्विंटेरोने संघाला १-१ अशी बरोबरी साधून दिली. मध्यंतरावेळी दोन्ही संघांमध्ये १-१ अशी बरोबरी होती. एक खेळाडू कमी झाल्याने कोलंबियाला डावपेच रचण्यावर येणाऱ्या मर्यादा स्पष्ट दिसत होत्या. जपानने भक्कम बचाव करण्याबरोबरच कोलंबियाचा प्रमुख खेळाडू जेम्स रॉड्रिगेज याला मोकळीक न देण्याची कामगिरीही व्यवस्थितणे पार पाडली. उत्तरार्धात ७३ व्या मिनिटास केईसुके होंडाच्या कॉर्नर किकवर युका ओसाकोने गोल करून जपानला पुन्हा आघाडीवर पोहचवले. ही आघाडी फोडण्यात कोलंबियाला अखेरपर्यंत यश आले नाही आणि जपानने २-१ अशा फरकासह विजयावर शिक्कामोर्तब केले.

दृष्टिक्षेप...

- वर्ल्ड कपमध्ये प्रथमच आशियाई संघाला दक्षिण अमेरिकन संघाविरुद्ध विजय मिळवण्यात यश आले. यापूर्वी, १७ सामन्यांत आशियाई संघाला दक्षिण अमेरिकन संघाविरुद्ध ही कामगिरी करता आली नव्हती.

- १९७४ नंतर प्रथमच वर्ल्ड कपमध्ये चार दक्षिण अमेरिकन संघाला सलामीच्या लढतीत विजय मिळवता आला नाही.

- एजी कावाशिमा (३५ वर्षे, ९१ दिवस) हा जपानचा वर्ल्ड कप खेळणारा सर्वाधिक वयाचा खेळाडू ठरला.

आकडेवारी

कोलंबिया संघ जपान

४१% चेंडूवरील ताबा ५९%

८ शॉट्स १४

३ ऑन टार्गेट ६

१ ऑफ टार्गेट ५

१५ फाउल्स ९

२ यलो कार्ड १

१ रेड कार्ड ०

३ कॉर्नर ६

१० फ्री किक १७