सौदी संघांच्या विमानाच्या इंजिनला आग
रुस्तोव्ह ऑन डॉन : आपल्या पुढील वर्ल्ड कप लढतीसाठी रुस्तोव्ह ऑन डॉनला निघालेल्या सौदी अरेबिया संघाचे खेळाडू बचावले. बचावले असेच म्हणावे लागेल; कारण त्यांच्या विमानाच्या उजव्या इंजिनाला आग लागली होती. सौदी फुटबॉल फेडरेशनने मंगळवारी हे वृत्त दिले. मात्र वेळीच ही बाब लक्षात आल्यानंतर विमानाचे सुरक्षित लँडिंग झाले. सौदीचा खेळाडू हतन बाहबिरचा एक व्हिडिओ सौदी संघाच्या अधिकृत ट्विटर अकाउंटवर अपलोड करण्यात आला आहे. यात हतन म्हणाला, 'आम्ही सुरक्षित लँड झालो; पण इंजिनात बिघाड झाला होता. आम्ही खूप घाबरलो नव्हतो; पण थोडीशी भीती वाटलीच. परमेश्वराचे यासाठी मनापासून आभार...'
बेल्जियमला घोळक्याची चिंता
सोची : बेल्जियमचे प्रशिक्षक रॉबर्तो मार्टिन्झ आणि एकूणच संपूर्ण संघव्यवस्थापन सध्या चिंतेत आहे. कारण प्रतिस्पर्धी संघातील बचावपटू आपला कर्णधार इडन हझार्ड याला लक्ष्य करतील. यामुळे त्याला इजा होईल, ज्यामुळे बेल्जियम संघ कर्णधार व स्पर्धा एका स्टार खेळाडूला मुकेल, अशी भीती त्यांना वाटते आहे. गेल्या सोमवारी सोची येथे पार पाडलेल्या लढतीत बेल्जियमने नवोदित पनामावर ३-० अशी मात केली आहे. या सामन्यात पनामाच्या पाच खेळाडूंना झाम्बियन रेफ्री जेनी सिकाझ्वे यांच्याकडून समज आणि कार्डही देण्यात आली. 'असे पाच, सहा जणांचा घोळका हझार्डला टक्कर देऊ लागला, तर त्याला दुखापत होण्याची शक्यता नाकारता येत नाही. अशा डावपेचांना रोखता येत नाही. तसा नियमही नाही,' असे प्रशिक्षक रॉबर्तो मार्टिन्झ म्हणाले.