म.टा. क्रीडा प्रतिनिधी, नागपूर
नागपूर जिल्हा फुटबॉल संघटनेतर्फे आयोजित जेएसडब्ल्यू सिनीअर डिव्हिजन फुटबॉल स्पर्धेत बुधवारी झालेल्या सामन्यात राहुल अकादमीने अल-अझीझ क्लबला १-१ असे बरोबरीत रोखले.
अजनी येथील मध्य रेल्वेच्या मैदानावरील सामन्यात मोहम्मद काफीलने मध्यंतरापूर्वी म्हणजे ४०व्या मिनिटाला गोल नोंदवून अल-अझीझ क्लबला आघाडी मिळवून दिली. मध्यंतरानंतर राहुल अकादमीच्या अमन तामरकरने ६७ व्या मिनिटाला गोल करण्याची संधी न गमावता १-१ अशी बरोबरी साधली. यानंतर गोल नोंदवून आघाडी घेण्यासाठी दोन्ही संघांनी आक्रमक खेळाचे प्रदर्शन केले. काही खेळाडूंना गोल नोंदवून आघाडी घेण्याची संधीही मिळाली. परंतु, सामना संपेपर्यंत कोणालाही गोल करण्यात यश आले नाही आणि सामना १-१ असा बरोबरीतच संपला.