म. टा. प्रतिनिधी, औरंगाबाद
जालना येथे झालेल्या आंतरशालेय विभागीय सुब्रतो मुखर्जी करंडक फुटबॉल स्पर्धेत खुलताबादेतील अल इरफान हायस्कूल संघाने १७ वर्षांखालील गटात विजेतेपद पटाकावले.
विभागीय सुब्रतो मुखर्जी करंडक फुटबॉल स्पर्धेत अल इरफान हायस्कूल संघाने सलग तीन विजय नोंदवत जेतेपदावर शिक्कामोर्तब केले. या कामगिरीमुळे अल इरफान हायस्कूलचा संघ राज्यस्तरीय फुटबॉल स्पर्धेसाठी पात्र ठरला आहे.
या स्पर्धेत सलामीच्या लढतीत अल इरफान हायस्कूलने जालन्यातील संघास ३-० असे हरवले. फैसल इनाम, मोहंमद कैफ, अब्दुल मोईज यांनी एकेक गोल नोंदवले. दुसऱ्या सामन्यात अल इरफानने बीड संघावर २-० ने मात केली. यात अब्दुल मोईज व शेख खालीद यांनी एकेक गोल केले. अंतिम सामन्यात अल इरफान हायस्कूल संघाने मौलाना आझाद हायस्कूल संघाचा अटीतटीच्या झुंजीत पेनल्टी किकवर ३-२ अशी मात करीत विजेतेपद संपादन केले. यात मीर हाशीर, मोहंमद दानिश, अक्रम खान यांनी एकेक गोल केले. या स्पर्धेत गोलरक्षक आमेर पठाण, शेख अफान, शेख फरानने लक्षवेधक कामगिरी नोंदवली. या संघास प्रशिक्षक कुरेशी मोहंमद अख्तर यांचे मार्गदर्शन लाभले. या कामगिरीबद्दल संस्थेचे अध्यक्ष मुज्तबा फारुख, सचिव मोहंमद इक्बाल, प्राचार्य मोहंमद अजहरुद्दिन, आशिष कान्हेड, संजय महाजन, वैभव किरगत, राजेंद्र गंगावणे यांनी खेळाडूंचे अभिनंदन करुन त्यांना राज्य स्पर्धेसाठी शुभेच्छा दिल्या.