अंतिम लढतीत पेरुवर ३-१ने मात
कोपा अमेरिका फुटबॉल स्पर्धा
वृत्तसंस्था, रिओ दी जानेरो
दहा खेळाडूंसह खेळलेल्या ब्राझील संघाने घरच्या मैदानावर खेळताना पेरु संघावर ३-१ने मात करून कोपा अमेरिका फुटबॉल स्पर्धेचे विजेतेपद पटकावले. ब्राझीलने ही स्पर्धा नवव्यांदा आणि २००७नंतर प्रथमच जिंकली. दुसरीकडे, १९७५ नंतर या स्पर्धेचे विजेतेपद पटकावण्याची पेरू संघाची संधी हुकली.
मराकाना स्टेडियमवर झालेल्या या लढतीत पंधराव्या मिनिटालाच एव्हर्टोनने गोल करून ब्राझीलला आघाडी मिळवून दिली होती. यानंतर जोस पावलो गुएरेरोने ४४व्या मिनिटाला पेनल्टीवर गोल करून पेरू संघाला बरोबरी साधून दिली. यानंतर मध्यंतराच्या अतिरिक्त वेळेत गॅब्रिएल जीससने गोल करून ब्राझीलला २-१ अशी आघाडी मिळवून दिली. मध्यंतरानंतर अखेरपर्यंत ब्राझीलने ही आघाडी कायम राखली होती. लढत संपायला २० मिनिटांचा अवधी असताना जीससला दुसरे यलो कार्ड मिळाले. त्यामुळे त्याला मैदान सोडावे लागले. या वेळी त्याला अश्रू अनावर झाले. रागात त्याने पाणीच्या बाटलीला लाथही मारली. त्याचबरोबर कॅमेराकडे बघून अश्लिल इशारेही केले. यानंतर अखेरच्या मिनिटाला राखीव खेळाडू रिचर्लिसन (९० मि.) याने पेनल्टीवर गोल करून ब्राझीलला ३-१ असा विजय मिळवून दिला.
अमेरिकेने पटकावले जेतेपद
लायन : अमेरिकेने नेदरलँड्सवर २-०ने मात करून महिलांच्या फुटबॉल वर्ल्ड कपचे जेतेपद राखले. अमेरिकेकडून मेगन रापिनो (६१ मि.) आणि रोझ लव्हली (६९ मि.) यांनी गोल केले.