बर्लिनः जर्मनीतील दुसऱ्या श्रेणीतील बुंदेसलिगा या फुटबॉल लीगने शनिवारी करोनाच्या लॉकडाउननंतर पुनरागमन केले. करोनामुळे स्पर्धा थांबवण्यात आल्यानंतर पुनरागमन करणारी बुंदेसलिगा ही पश्चिम युरोपातील पहिलीच लीग ठरली आहे. बुंदेसलिगामधील पहिल्या श्रेणीच्या लढती शनिवारी संध्याकाळी सातच्या सुमारास सुरू झाल्या, तर त्याच्या अडीच तासआधी दुसऱ्या श्रेणीच्या लढतींना प्रारंभ झाला होता. त्यामुळे गेल्या दोन महिन्यांपासून क्रीडा स्पर्धांच्या थेट प्रक्षेपणाला आसूसलेल्या क्रीडाप्रेमींना बुंदेसलिगाने समाधान दिले. मात्र त्याचवेळी दुसऱ्या श्रेणीतील हनोव्हर विरुद्ध डायनेमो ड्रेसडन ही लढती स्थगित करण्यात आली. ड्रेसडन संघातील खेळाडूंच्या करोना चाचणीत दोन सदस्य करोना पॉझिटिव्ह आढळल्याने या संघाला विलगीकरणात पाठवण्यात आले आहे.
\B-पहिला गोल\B
बुंदेसलिगा लढतीत द. कोरियाच्या ली जाए सुंग याने तिसऱ्याच मिनिटाला गोल करून हॉलस्टेन किएलला आघाडी मिळवून दिली. हा लीगच्या पुनरागमनानंतरचा पहिला गोल ठरला. मार्चमध्ये ही लीग स्थगित करण्यात आली होती.