Live सामन्यात दगड, चप्पल, विटा, बाटल्या फेकल्या; धक्काबुक्की, मारहाण; ७० जणांवर कारवाई

कोल्हापूर: शाहू छत्रपती केएसए वरिष्ठ साखळी फुटबॉल स्पर्धेतील सामन्यात खेळाडू आणि समर्थकांमध्ये झालेल्या राड्याची पोलिस प्रशासनाने गंभीर दखल घेतली आहे. शिवाजी तरुण मंडळ आणि प्रॅक्टिस फुटबॉल क्लबच्या खेळाडू आणि हुल्लडबाज समर्थकांवर गुन्हे दाखल करत कडक पावले उचलली आहेत.

केएसए लीग अंतर्गत शाहू स्टेडियम येथे शनिवारी झालेल्या शिवाजी तरुण मंडळ विरुद्ध प्रॅक्टिस फुटबॉल क्लबचे खेळाडू व समर्थकांमध्ये राडा झाला होता. हाणामारी, दगडफेक आणि पोलिसांचा लाठीमार झाला. या प्रकरणात जुना राजवाडा पोलिसांनी दोन्ही संघांचे १७ खेळाडू व ५० समर्थकांविरोधात रविवारी गुन्हा दाखल झाला आहे. या घटनेने फुटबॉल वर्तुळात एकच खळबळ उडाली आहे.

फुटबॉलची पंढरी म्हणून कोल्हापूरची ओळख येथील पेठापेठा मध्ये आपल्याला फुटबॉल प्रेमी पाहायला मिळतात. शिवाय या पेठापेठा मध्ये दरवर्षी केएसए लीग देखील भरत असते. शनिवारी २८ जानेवारी रोजी कोल्हापुरातील पारंपरिक विरोधी संघ शिवाजी तरुण मंडळ विरुद्ध प्रॅक्टिस फुटबॉल क्लब यांच्यात सामना खेळविण्यात आला. या सामन्यात दोन्ही संघांच्या खेळाडूंनी खेळ करत मैदानावर मारामारी केली. त्याचे पडसाद समर्थकांत उमटले. प्रेक्षक गॅलरीतील समर्थकांमध्ये हाणामारीचा प्रकार घडला.

वाचा-टीम इंडियाच्या विजयात चहलने केला विक्रम; आजवर एकाही भारतीय गोलंदाजाला जमली नाही अशी कामगिरी

हा सामना प्रॅक्टिस क्लबने १ वि. ० गोलने जिंकला. मैदानाबाहेर समर्थकांमध्ये याचे पडसाद उमटल्याने दोन्ही समर्थक आमने-सामने आले. दगड, चप्पल, विटा, बाटल्या एकमेकांच्या दिशेने भिरकावल्याने मोठा गोंधळ उडाला होता. खेळाडूंमध्ये झालेल्या धक्काबुक्की, मारहाण, दगडफेकप्रकरणी शिवाजी तरुण मंडळाचे रोहन आडनाईक, योगेश कदम, करण चव्हाण-बंदरे, संदेश कासार, ऋतुराज सूर्यवंशी, विक्रम शिंदे, संकेत साळोखे, मयुरेश चौगुले यांच्या विरोधात तर प्रॅक्टिस क्लबचे अर्जुन साळुंखे, संकेत जाधव, सागर चिले, राहुल पाटील, सचिन गायकवाड, ओंकार जाधव, सागर पवार, आदित्य पाटील, अमित बिसवास या खेळाडूंसह दोन्ही बाजूच्या प्रत्येकी २५ समर्थकांविरोधात गुन्ह नोंदविण्यात आला. पोलिसांच्या वतीने याप्रकरणी फिर्याद दाखल करण्यात आली.