दृष्टिक्षेप...
- उमेश यादवला वगळले.
-रोहित येणार सलामीला
-शुभम गिलचा समावेश
- २६ सप्टेंबरपासून होणाऱ्या सुरू होणाऱ्या सराव सामन्यात रोहित अध्यक्षिय संघाचे नेतृत्व करेल.
- शिखर आणि विजय यांचा सलामीवीर म्हणून विचार नाहीच.
- अष्टपैलू हार्दिक पंड्याचाही कसोटीसाठी विचार करण्यात आलेला नाही.
वृत्तसंस्था, नवी दिल्ली
गेले वर्षभर सातत्याने अपयशी ठरणारा सलामीवीर लोकेश राहुलला दक्षिण आफ्रिकेविरुद्धच्या आगामी कसोटी मालिकेसाठी भारतीय संघातून वगळण्यात आले आहे. त्याच्या जागी रोहित शर्मा स्थान देण्यात आले आहे. रोहित शर्मा कसोटीत प्रथमच सलामीला येईल, हे जवळपास निश्चित झाले आहे.
रोहित शर्माने मर्यादित षटकांच्या क्रिकेटमध्ये चमकदार कामगिरी केली आहे. मात्र, कसोटीत रोहितला स्थान पक्के करता आलेले नाही. रोहितकडे २१८ वनडे सामन्यांचा अनुभव आहे. मात्र, केवळ २७ कसोटी त्याच्या नावावर जमा आहेत. भारतीय क्रिकेट संघाचे निवड समितीचे अध्यक्ष प्रसाद म्हणाले, 'मागील सहा वर्षांपासून रोहित वनडेत सलामीला येत आहे. सलामीवीर म्हणून त्याने आपली क्षमता सिद्ध केली आहे. याचा फायदा कसोटीतही झाला, तर चांगलेच आहे.' दुसरीकडे, २०१४मध्ये कसोटी पदार्पण करणाऱ्या लोकेश राहुलला ३६ कसोटींत संधी मिळाली. त्याने ३४.५८च्या सरासरीने २००६ धावा केल्या. मागील अठरा महिन्यांत मात्र त्याला एकही शतक ठोकता आले नाही. तेव्हा बदल म्हणून निवड समितीने लोकेश राहुल ऐवजी रोहित शर्माला सलामीला पाठविण्याचा निर्णय घेतला आहे. लोकेश राहुलला पुरेशी संधी दिली. मात्र, त्याला कामगिरी सातत्य राखता आले नाही. त्याला देशांतर्गत स्पर्धेत चमकदार कामगिरी करून पुन्हा संघात स्थान मिळवता येऊ शकते, असेही प्रसाद म्हणाले.
पंतला स्पर्धा
भारतीय निवड समितीने ऋषभ पंतचे कसोटीतील स्थान कायम ठेवले आहे. मात्र, संघ निवड करताना त्यांनी यष्टीरक्षक फलंदाज वृद्धिमान साहा याचीही निवड केली आहे. त्यामुळे पंतचे अंतिम अकरातील स्थान निश्चित आहे. किंवा तिन्ही लढतींत तो खेळेलच, याची आता खात्री नाही. त्याला कारणही तसेच आहे. मागील काही सामन्यांत पंतला संधी मिळूनही तो खराब फटके मारून बाद झाला आहे.
...
पहिली कसोटी - २ ऑक्टोबरपासून - विशाखापट्टणम
दुसरी कसोटी - १० ऑक्टोबरपासून - पुणे
तिसरी कसोटी - १९ ऑक्टोबरपासून - रांची
.............
कसोटी संघ : विराट कोहली (कर्णधार), मयांक अगरवाल, रोहित शर्मा, चेतेश्वर पुजारा, अजिंक्य रहाणे (उपकर्णधार), हनुमा विहारी, ऋषभ पंत, वृद्धिमान साहा, रविचंद्रन अश्विन, रवींद्र जाडेजा, कुलदीप यादव, मोहम्मद शमी, जसप्रीत बुमराह, इशांत शर्मा, शुभमन गिल.
सराव सामन्यासाठीचा अध्यक्षीय संघ : रोहित शर्मा (कर्णधार), मयांक अगरवाल, प्रियांक पंचाल, ईश्वरन, करुण नायर, सिद्धेश लाड, केएस भरत (यष्टिरक्षक), जलज सक्सेना, धरमेंद्रसिंन्ह जाडेजा, आवेश खान, इशान पोरेल, शार्दूल ठाकूर, उमेश यादव.
..........
रोहित शर्मा (वय ३२)
२७ कसोटी
१५८५ धावा
३९.६२ सरासरी
३ शतके
१० अर्धशतके
....
पदार्पण- नोव्हेंबर २०१३, विंडीज
अखेरची कसोटी- डिसेंबर २०१८, ऑस्ट्रेलिया
......
रोहितला आम्ही सलामीला संधी देऊ इच्छितो. यासाठी तो आणि संघव्यवस्थापनही सज्ज आहे. अर्थात, अंतिम निर्णय नंतर घेण्यात येईल. शुभमन गिलकडे आम्ही सलामीचा आणि मधल्या फळीचा फलंदाज म्हणून बघत आहोत. जास्तीतजास्त सामने खेळल्यावर त्याला संधी मिळेल. तो क्रिकेटच्या तिन्ही प्रकारासाठी योग्य खेळाडू आहे.
- एमएसके प्रसाद, निवड समितीचे अध्यक्ष