फुटबॉल स्टार लिओनेल मेस्सीने केली निवृत्तीची घोषणा; या स्पर्धेत खेळणार अखेरची मॅच

नवी दिल्ली: फुटबॉल विश्वातील दिग्गज खेळाडू लिओनेल मेस्सीने निवृत्ती संदर्भात एक मोठी घोषणा केली आहे. या वर्षी कतारमध्ये होणाऱ्या फिफा वर्ल्डकपनंतर मेस्सी निवृत्ती घेणार आहे. ३५ वर्षीय अर्जेंटिनाच्या या स्टार खेळाडूचा हा पाचवा फिफा वर्ल्डकप असणार आहे.

सेबास्टियन विग्नोलो यांच्या सोबत झालेल्या एका मुलाखतीत मेस्सीने आगामी फिफा वर्ल्डकप हा आपला अखेरचा वर्ल्डकप असेल असे सांगितले. हा निर्णय मी आधीच घेतला आहे आणि संघाला देखील याची माहिती दिली आहे. माझा अखेरचा वर्ल्डकप असेल.

वाचा- तुला काय वाटते मी...; फोन चेक केल्यानंतर खेळाडूची गर्लफ्रेंड संतापली, बीचवरच झाला राडा

मेस्सीने अर्जेंटिनासाठी आतापर्यंत ४ वर्ल्डकप खेळले आहेत. त्याने २००५ साली राष्ट्रीय संघाकडून पदार्पण केले होते. मेस्सीने १६४ आंतरराष्ट्रीय सामने खेळले आहेत. अर्जेंटिनाच्या सिनिअर संघाकडून त्याने ९० गोल केले आहे. मी कतारमध्ये होणाऱ्या फिफा वर्ल्डकप बाबत फार उत्सुक आहे आणि त्याची वाट पाहतो आहे. अर्थात यासाठी मी थोडा काळजीत देखील आहे. माझा अखेरचा वर्ल्डकप कसा असेल. माझी इच्छा आहे की सर्व काही चांगले होवो.


फुटबॉल विश्वात मेस्सीचे नाव इतके मोठे असले तरी त्याला राष्ट्रीय संघासाठी एकदाही वर्ल्डकप जिंकून देता आला नाही. मेस्सीने गेल्या वर्षी देशाला कोपा अमेरिका स्पर्धेचे विजेतेपद मिळवून दिले होते. या स्पर्धेच्या अंतिम फेरीत अर्जेंटिनाने ब्राझीलचा पराभव केला होता.

वाचा-टॉपलेस होऊन महिला Live सामन्यात मैदानात घुसली; फोटो, व्हिडिओची जगभरात चर्चा

२०१४ साली अर्जेंटिनाला फिफा वर्ल्डकप जिंकण्याची संधी होती. त्या वर्ल्डकपमध्ये मेस्सीची कामगिरी शानदार झाली होती आणि अर्जेंटिना अंतिम फेरीत देखील पोहोचली होती. पण जर्मनीने त्यांचा पराभव केला आणि विजेतेपद मिळवले होते.

मेस्सीला वर्ल्डकप जरी जिंकता आला नसला तरी मोठ्या स्पर्धेत त्याची कामगिरी शानदार झाली आहे. २०१४ वर्ल्डकप, कोपा अमेरिका २०१५ आणि २०२१ मध्ये सर्वोत्तम खेळाडूचा पुरस्कार त्याला मिळाला होता. २०१४च्या वर्ल्डकपमध्ये मेस्सीने धमाकेदार कामगिरी केली होती. त्याला ४ वेळा मॅन ऑफ द मॅच पुरस्कार मिळाला होता. त्याच बरोबर एका कोपा अमेरिका सीझनमध्ये सर्वाधिक वेळा मॅन ऑफ द मॅच पुरस्कार मिळवण्याचा विक्रम त्याच्या नावावर आहे.