पॅरीसमध्ये रात्रभर रंगला विजयोत्सव
वृत्तसंस्था, पॅरीस
फुटबॉल वर्ल्डकपमध्ये बेल्जियमविरुद्ध लढतीच्या ५१व्या मिनिटाला फ्रान्सकडून गोल झाला. तेव्हापासून फ्रान्समधील जल्लोषाला सुरुवात झाली. हा जल्लोष रात्रभर सुरू होता. पॅरीसमध्ये तर या विजयोत्सवाला उधाण आले होते. आपल्या देशाचा झेंडा घेऊन हजारो चाहते रस्त्यावर उतरले होते. त्यांच्या तोंडी देशाचे राष्ट्रगाण होते, त्याचबरोबर फ्रान्सचा विजय असो आणि आम्ही फायनलला पोहोचला अशा घोषणा दिल्या जात होत्या. काहींनी कारचा हॉर्न वाजवित, तर काहींनी फटाक्यांच्या आतषबाजींनी हा आनंद साजरा केला.
पॅरीसमधील ऐतिहासिक हॉटेल डी व्हिल येथे ही लढत बघण्यासाठी मोठा पडदा लावण्यात आला होता. तेथे ही लढत बघण्यासाठी २० हजार फुटबॉलप्रेमी जमले होते. यात काही जण झाडांवर चढून बसले होते, तर काही जण कारच्या छतांवर. उमटिटीने गोल केल्यानंतर या जल्लोषाला सुरुवात झाली. चाहते आनंदाने नाचू लागले. विजय आपलाच आहे, हे फ्रान्सच्या चाहत्यांनी ठरवूनच टाकले होते. या आनंदोत्सवात लहान मुलांपासून आबालवृद्धांपर्यंत साऱ्यांचा समावेश होता. फ्रान्सच्या संघाचा आम्हाला अभिमान वाटतो, अशी प्रतिक्रिया चाहत्यांमधून येत होत्या. जे चाहते घरी बसून किंवा हॉटले, मित्र-मैत्रीणींकडे लढत बघत होते, ते फ्रान्सने विजय मिळवताच रस्त्यावर उतरले.
नोव्हेंबर २०१५मध्ये फ्रान्सवर दहशतवादी हल्ला झाला होता. तेव्हापासून टाउन हॉल परीसरात पोलिसांचा कडेकोट बंदोबस्त ठेवण्यात आला आहे. मात्र, तेथेही जल्लोष सुरू होता. सेबॅस्टियन नावाचा फ्रान्समधील एक युवक म्हणाला, '१९९८मध्ये मी केवळ १८ वर्षांचा होतो. आता ही रात्र माझ्यासाठी अविस्मरणीय आहे. रविवारी रात्री असाच जल्लोष आम्हाला साजरा करायचा आहे.' यातील अनेकांच्या अंगावर फ्रान्सची जर्सी होती. छोट्या-छोट्या गटाने लोक विजयाचा आनंद साजरा करीत होते. अंतिम फेरीत दाखल होण्यास फ्रान्सचा संघ पात्र असून, हा संघच विजेतेपद मिळवणार, असा विश्वास फ्रान्सच्या नागरीकांना वाटत आहे.