इंग्लंडचा माजी फुटबॉलपटू रूनीची तक्रार
वृत्तसंस्था, लंडन
करोना विषाणू संसर्गामुळे उद्भवलेल्या संकटामध्ये ब्रिटीश सरकार आणि फुटबॉल संघटनांकडून खेळाडूंना गिनी पिगप्रमाणे (प्रयोगशाळेमध्ये प्रयोगांसाठी वापरण्यात येणारे प्राणी) वागणूक देण्यात येत असल्याची टीका मँचेस्टर युनायटेडचा माजी फुटबॉलपटू वेग रूनीने केली आहे.
इंग्लंडमधील 'इंग्लिश प्रीमियर लीग' आणि फुटबॉल लीग या स्पर्धांचे सामने ३ एप्रिलपर्यंत पुढे ढकलण्यात आले आहेत. तथापि, हा निर्णय घेण्यासाठी विलंब केल्याबद्दल रूनीने नापसंती व्यक्त केली. आर्सेनल क्लबचे व्यवस्थापक मिकेल आर्टेटा आणि चेल्सीचा खेळाडू कॉलम हडसन-ओडोई यांना करोनाची लागण झाल्याचे स्पष्ट झाल्यानंतर शुक्रवारी (१३ मार्च) हा निर्णय घेण्यात आला. खेळाडू, सहकारी वर्ग आणि त्यांच्या कुटुंबीयांसाठी हा आठवडा भीतीदायक होता. सरकारमध्ये, तसेच इंग्लंड फुटबॉल संघटना व प्रीमियर लीगच्या व्यवस्थापनामध्ये नेतृत्वाचा अभाव असल्याचे या आठवड्यामध्ये जाणवले, असेही रूनीने लिहिलेल्या स्तंभात म्हटले आहे.
...
स्वित्झर्लंडच्या अध्यक्षांना संसर्ग
बेर्न (स्वित्झर्लंड) : स्वित्झर्लंड फुटबॉल संघटनेचे अध्यक्ष डॉमिनिक ब्लँक यांना करोना विषाणूचा संसर्ग झाला आहे. रविवारी सकाळी त्यांच्या चाचणीचे अहवाल आले. त्यात ७० वर्षीय ब्लँक यांना संसर्ग झाल्याचे स्पष्ट झाले आहे. त्यांना घरातच विलग ठेवण्यात आले आहे. खरे तर मला आता बरे वाटत असून, मला आता केवळ थोडा ताप आहे, असे ब्लँक यांनी प्रसिद्ध केलेल्या पत्रकात म्हटले आहे. स्वित्झर्लंड फुटबॉल फेडरेशनचे मुख्य कार्यालय बंद ठेवण्यात आले असून, ब्लँक यांच्या संपर्कात आलेल्या सर्वांची वैद्यकीय तपासणी करण्यात येणार आहे.