म.टा. क्रीडा प्रतिनिधी, नागपूर
नागपूर जिल्हा फूटबॉल संघटनेतर्फे आयोजित एलिट डिव्हिजन फूटबॉल स्पर्धेत रविवारी झालेल्या सामन्यात राहुल क्लब आणि दक्षिा पूर्व मध्य रेल्वे संघानी विजय मिळवत स्पर्धेत आगेकूच केली.
अजनीच्या रेल्वे मैदानावर रविवारी पहिली लढत राहुल फूटबॉल क्लबविरुद्ध नागपूर अकादमी यांच्यात झाला. या सामन्यात राहुल क्लबने ४-० अशा गोलने विजय नोंदवला. सामन्यात सुरूवातीपासून गोल नोंदविण्याच्या उद्देशाने राहुल क्लबच्या फूटबॉलपटूंनी प्रयत्न केले. सामन्यात आठव्या मिनिटाला विजयी संघाच्या सागर चंताला याने गोल नोंदवित सामन्यात १-० अशी आघाडी संघाला मिळवून दिली. त्यानंतर १५व्या मिनिटाला शहजाद खान याने गोल नोंदवित या आघाडीत २-० अशी भर घातली. यानंतर लगेचच २१व्या मिनिटाला बेल्सन साजीने गोल नोंदवत ३-० अशी आघाडी राहुल क्लबला मिळवून दिली. यादरम्यान प्रतिस्पर्धी संघाच्या खेळाडूंनी गोल नोंदविण्यासाठी वारंवार प्रयत्न केले. मात्र त्यांना गोल नोंदविण्यात अपयश आले. मध्यांतरापर्यंत हीच गोलसंख्या कायम राहिली. मध्यांतरानंतर राहुल क्लब सामन्यात अधिक आघाडी घेण्यासाठी प्रयत्न करीत होता. सामन्यात गोल नोंदवून बरोबरी साधण्याचा प्रयत्न नागपूर अकादमीचे खेळाडू करीत होते. मात्र ६८व्या मिनिटाला विजयी संघाच्या राहुल नेवारने गोल नोंदवित संघाला ४-० अशी आघाडी मिळवून दिली. निर्धारीत वेळेपर्यंत राहुल क्लबने ही आघाडी कायम ठेवत विजय मिळवला.
नंतरच्या सामन्यात दपूम रेल्वे संघाने प्रतिस्पर्धी नागपूर ब्ल्यूजला ३-० अशा गोलने मात दिली. सामन्यात सातव्याच मिनिटाला विजयी संघाच्या आकिब फराजने गोल नोंदवित सामन्यात १-० अशी आघाडी मिळवून दिली. यादरम्यान नागपूर ब्ल्यूजच्या फूटबॉलपटूंनी गोल नोंदविण्यासाठी अनेक आक्रमणे केली. मात्र विजयी संघाच्या गोलरक्षकांनी ती उत्तमपणे परतावून लावली. यादरम्यान ३९व्या मिनिटाला परत आकिबने वैयक्तिकरित्या आणि संघासाठी दुसरा गोल नोंदवित सामन्यात २-० अशी गोलसंख्या केली. मध्यांतरापर्यंत हीच गोलसंख्या कायम राहिली. मध्यांतरानंतर सुरू झालेल्या खेळात दोन्ही संघाने गोल नोंदविण्याच्या दृष्टीने प्रयत्न सुरु केले. मात्र ५३ व्या मिनिटाला दपूम रेल्वेच्या तुषालने गोल नोंदवत संघाला ३-० अशी आघाडी मिळवून दिली. सामन्याच्या निर्धारीत वेळेपर्यंत एकही गोल नोंदविण्यात नागपूर ब्ल्यूज संघाला यश न आल्याने पराभव स्वीकारावा लागला.