म. टा. क्रीडा प्रतिनिधी, नागपूर
सागर चिंतालाने केलेल्या दोन गोलच्या जोरावर राहुल क्लबने जेएसडब्लू एलिट डिव्हिजन फूटबॉल स्पर्धेत नागपूर ब्लूज संघाला २-० असा पराभवाचा धक्का दिला. या पराभवाने नागपूर ब्लूज संघाची स्पर्धेतील विजयी घोडदौड थांबली.
नागपूर जिल्हा फूटबॉल संघटनेच्या वतीने या स्पर्धेचे आयोजन करण्यात आले आहे. अजनी रेल्वेच्या मैदानावर सोमवारी राहुल क्लब आणि नागपूर ब्लूज यांच्यात लढत झाली. सुरुवातीला काही मिनिटे संथ खेळ केल्यानंतर दोन्ही संघांनी आघाडी घेण्यासाठी प्रयत्न केले. मात्र, काही चांगल्या संधी मिळूनही गोल करण्यात संघाला अपयशच आले. त्यामुळे पहिला हाफ ०-० असा बरोबरीत राहील, असे वाटत होते. निर्धारित ४५ व्या मिनिटांपर्यंत गोलसंख्या ०-० अशीच होती. त्यामुळे खेळ बरोबरीत सुटेल, असे वाटत असताना पहिल्या हाफच्या अतिरिक्त वेळेत म्हणजे ४६ व्या मिनिटाला राहुल क्लबच्या सागर चिंतालाने नागपूर ब्लूजच्या बचावफळी व गोलरक्षकाला चकमा देत संघाला १-० अशी आघाडी मिळवून दिली. त्यामुळे संघाला पहिल्या हाफमध्ये १-० अशी निसटती आघाडी मिळाली. दुसऱ्या हाफचा खेळ सुरू झाल्यावर राहुल क्लबच्या चिंतालाने ४८ व्या मिनिटालाच गोल करत संघाची आघाडी २-० अशी वाढवली. दोन गोलने माघारल्यानंतर नागपूर ब्लूज संघाने सामन्यात परतण्याचे अथक प्रयत्न केले. मात्र, राहुल क्लबच्या दर्जेदार बचावफळीला भेदण्यात संघाला अपयश आल्याने निर्धारित वेळेपर्यंत गोलसंख्या २-० अशीच होती. त्यामुळे राहुल क्लबने एलिट डिव्हीजन स्पर्धेत आणखी एक विजय नोंदवत स्पर्धेत आघाडी घेतली.
धोकादायक खेळ केल्याबद्दल राहुल क्लबच्या आबीद शेख आणि गौरव सायरे, तर ब्लूज संघाच्या इम्तेसाल खान आणि मोहम्मद इमरानला पिवळे कार्ड दाखवण्यात आले.
.....