म.टा. क्रीडा प्रतिनिधी, नागपूर
पंकज सहारेने केलेल्या एकमेव गोलच्या बळावर रेंज पोलिस संघाने चुरशीच्या लढतीत ईगल फूटबॉल क्लबला १-० अशा गोलफरकाने पराभूत करीत जेएसडब्ल्यू-एनडीएफए सुपर डिव्हिजन फूटबॉल स्पर्धेत आगेकूच कायम ठेवली.
रेंज पोलिस मैदानावर गुरुवारी ईगल स्पोर्टिंग क्लब आणि रेंज पोलिस यांच्यात लढत झाली. सामन्याची सुरूवात दोन्ही संघांनी उत्तम केली. त्यामुळे सुरुवातीच्या खेळात दोन्ही संघांना आघाडी घेण्यात अपयश आले. मात्र सामन्याच्या २५व्या मिनिटाला रेंज पोलिस संघाच्या पंकज सहारेने ईगल क्लबच्या बचाव फळीला भेदण्यात यश मिळवले. पंकजने संघासाठी पहिला गोल नोंदवत १-० अशी आघाडी मिळवून दिली. मध्यांतरापर्यंत रेंज पोलिस संघाने ही आघाडी कायम ठेवली. पहिल्या हाफमध्ये बरोबरी साधण्याचे ईगल क्लबने प्रयत्न केले, मात्र, त्यांना अपयश आले. एका गोलने माघारलेल्या ईगल स्पोर्ट्सने मध्यंतरानंतरच्या खेळात बरोबरी साधण्याचे प्रयत्न केले. यादरम्यान ईगलच्या खेळाडूंना गोल करण्याच्या अनेक संधी मिळाल्या. मात्र कोणालाही गोल करण्याचा सूर गवसला नाही. रेंज पोलिसने सामन्याच्या सुरुवातीला प्राप्त आघाडी सामना संपेपर्यंत कायम ठेवीत विजय नोंदवला.