म. टा. प्रतिनिधी, पुणे
अव्वल मानांकित शौनक शिंदे याने मोसमातील दुसऱ्या जिल्हा मानांकन टेबल टेनिस स्पर्धेतील १८ वर्षांखालील मुलांच्या गटाचे विजेतेपद पटकावले, शौनकचे हे मोसमातील दुसरे जेतेपद ठरले. दरम्यान, दीपेश अभ्यंकर यांनी बाजी मारली.
स्पर्धेतील १८ वर्षांखालील मुलांच्या अंतिम लढतीत शौनकने सहाव्या मानांकित आरूष गलपल्लीला ४-३ असे पराभूत करून जेतेपदावर शिक्कामोर्तब केले. मोसमातील पहिल्या जिल्हा मानांकन स्पर्धेतही हे दोघे जेतेपदासाठी आमनेसामने आले होते. त्यातही शौनकने ४-२ अशी बाजी मारली होती. अर्थात, तशाच कामगिरीची पुनरावृत्ती करण्यासाठी शौनक उत्सुक होता, तर गतपराभवाचे उट्टे काढून जेतेपद मिळविण्यासाठी आरूष उत्सुक होता. शौनकने चांगली सुरुवात केली. त्याने पहिल्या गेममध्ये ११-४ अशी बाजी मारली. मात्र, त्यानंतर आरूषने ११-७, ११-८ अशा सलग दोन गेम जिंकल्या आणि २-१ अशी आघाडी घेतली. त्यानंतर शौनकने ११-३, ११-८ अशा सलग दोन गेम जिंकल्या आणि ३-२ अशी आघाडी घेतली. आव्हान राखण्यासाठी आरूषला सहावी गेम जिंकणे गरजेचे होते. काळजाचा ठोका चुकविणाऱ्या गेममध्ये आरूषने १३-११ अशी बाजी मारली आणि ३-३ अशी बरोबरी साधली. निर्णायक, सातव्या गेममध्ये कोण बाजी मारणार, याबाबत उत्सुकता शिगेला पोचली होती. या गेममध्ये शौनकने ११-९ अशी बाजी मारली आणि जेतेपदावर शिक्कामोर्तब केले. दरम्यान, उपांत्य फेरीत शौनकने चौथ्या मानांकित आदर्श गोपालला ३-११, ९-११, ११-९, १२-१०, ८-११, ११-९, ११-९ असे, तर आरूषने द्वितीय मानांकित करण कुकरेजाला ६-११, ११-८, ११-६, ११-६, ११-६ असे पराभूत केले होते. महाराष्ट्रीय मंडळात अकरावीत शिकणारा शौनक हा सन्मित्र संघात रोहित चौधरी यांच्या मार्गदर्शनाखाली सराव करतो.
प्रौढ गटात द्वितीय मानांकित दीपेश अभ्यकरांनी आठव्या मानांकित नितीन मेहेंदळेंवर ११-७, ५-११, ११-७, १२-१० अशी मात केली आणि जेतेपद पटकावले.
---------
रोहित-देविका यांना जेतेपद
मिश्र दुहेरीत रोहित चौधरी-देविका भिडे या अव्वल मानांकितांनी विजेतेपद पटकावले. अंतिम लढतीत रोहित-देविका यांनी आदर्श गोपाल-ईशा जोशी या तिसऱ्या मानांकितांवर ११-६, ९-११, १०-१२, ११-८, ११-७ अशी मात केली. तत्पूर्वी, उपांत्य फेरीत रोहित-देविका यांनी ऋषभ सावंत-सलोनी शहा यांच्यावर ११-८, ११-९, ११-९ असा, तर आदर्श गोपाल-ईशा जोशी यांनी सुयोग पाटील-चाओबा थूनाओजाम यांच्यावर ११-८, ११-६, ११-६ असा विजय नोंदविला होता.