म. टा. प्रतिनिधी, औरंगाबाद
जिल्हा क्रीडा कार्यालय व महापालिका यांच्यातर्फे आयोजित आंतर शालेय सुब्रतो करंडक फुटबॉल स्पर्धेत १४ वर्षांखालील गटात युनिर्व्हसल हायस्कूल, पोदार स्कूल, बून स्कूल, बुऱ्हाणी नॅशनल उर्दु हायस्कूल, स्कॉलर व्हॅली स्कूल या संघांनी विजयी आगेकूच केली आहे.
आमखास मैदानावर ही स्पर्धा होत आहे युनिर्व्हसल हायस्कूल संघाने वूडरिच हायस्कूल संघाचा टायब्रेकमध्ये ३-१ असा पराभव केला. द जैन इंटरनॅशनल स्कूल संघास पुढे चाल देण्यात आली. पोदार आयसीएसई स्कूल संघाने पोदार सीआयई स्कूल संघावर ४-१ अशी सहज मात केली. पोदार सीबीएसई स्कूल संघाने एम. पी. सरोश हायस्कूल संघाचा २-० असा पराभव केला.
बीएफसीआय स्कूल संघास पुढे चाल मिळाली. बून इंग्लिश स्कूल संघाने मॉडेल स्कूल संघावर १-० ने मात केली. बुऱ्हाणी नॅशनल उर्दु हायस्कूल संघाने नागसेन विद्यालय संघाचा ५-० असा मोठा पराभव केला. स्कॉलर व्हॅली सीबीएसई स्कूल संघाने बुऱ्हाणी नॅशनल इंग्लिश स्कूल संघावर टायब्रेकमध्ये ३-२ असा विजय संपादन केला. या सामन्यांमध्ये नकुल वाघ, रेगीन, आयान, आदिल, तहा खान, फराज खान, शेख अमन, शेख फैजान यांनी लक्षवेधक कामगिरी बजावत आपापल्या संघांना विजय मिळवून दिला.