सारे काही तिथेच सोडून आल्याची प्रशिक्षक साउथगेट यांची भावना
वृत्तसंस्था, मॉस्को
'आम्ही सर्वोत्तम खेळ करण्यात कमी पडलो; पण यातून योग्य तो धडा नक्की घेऊ. बाकी सारे काही मैदानातच सोडून आलो आहोत,' अशी प्रतिक्रिया इंग्लंड संघाचे प्रशिक्षक गॅरेथ साउथगेट यांनी व्यक्त केली.
उपांत्य फेरीत इंग्लंडला क्रोएशियाने नमविले. त्यानंतर त्यांनी आपल्या भावनांना वाट मोकळी करून दिली. ते म्हणाले, 'पूर्वार्धात आमचा खेळ चांगला झाला होता. कदाचित आम्ही आणखी एक गोल करू शकलो असतो. जेव्हा तुम्ही सर्वोत्तम संघाविरुद्ध खेळत असता, तेव्हा तुम्हाला चान्स घ्यावाच लागतो. मात्र, तरीही सर्वोत्तम खेळ करण्यात आम्ही कमी पडलो.' लढत संपल्यानंतर इंग्लंडच्या खेळाडूंचे सांत्वन करताना साउथगेट दिसून आले. ते म्हणाले, या क्षणी मी खेळाडूंना काही जास्त विचारू शकत नाही. त्यांना चांगले वाटेल, असेही या क्षणी काही बोलणे अशक्य आहे. मात्र, एवढंच सांगेन की आम्ही जे काही साध्य केले, त्याचा अभिमान आहे.' साउथगेट हे क्रोएशियाच्या खेळाडूंचे कौतुक करायला विसरले नाहीत. आता झाले गेले विसरून आम्हाला पुढे जायला हवे. अशा निराशाजनक स्थितीत एक संघ म्हणून आम्हाला एकमेकांसोबत राहायला हवे, असेही साउथगेट यांनी नमूद केले. कर्णधार हॅरी केनचे कौतुक करायला ते विसरले नाहीत. ते म्हणाले, 'त्याने आपल्या संघासाठी शक्य ते सारे काही केले. या स्पर्धेत त्याने हुशारीने संघाचे नेतृत्व केले.' साउथगेट यांच्या मार्गदर्शनाखाली इंग्लंडने युरो २०१६च्या स्पर्धेत उपांत्य फेरीपर्यंत मजल मारली होती. खरे तर ड्रॉ जाहीर होण्यापूर्वी इंग्लंडला फारसे कोणी गृहीत धरले नव्हते. मात्र, ड्रॉ अनुकूल असल्याचे पाहून त्यानुसार इंग्लंडने योजना आखल्या. खेळाडूंचा आंतरराष्ट्रीय सामन्यांचा अनुभव लक्षात घेता या वर्ल्ड कपमध्ये इंग्लंडचा संघ तसा कमी अनुभवी होता. क्रोएशियाविरुद्धही इंग्लंडलाच फेव्हरिट समजले जात होते. मात्र, त्यांना या लढतीत आपल्या लौकिकाला साजेसा खेळ करताच आला नाही.
...
सध्या संघातील प्रत्येक जण निराश झाला आहे. कुठल्याच संघाला पराभूत होऊ असा खेळ करावासा वाटू शकत नाही. आता पराभव स्वीकारणे सर्वांनाच जड जाणार आहे.
- साउथगेट, इंग्लंडचे प्रशिक्षक
...