प्रथमच भारतीय खेळाडूची या पुरस्कारासाठी निवड
वृत्तसंस्था, लॉसन
भारतीय पुरुष हॉकी संघाचा कर्णधार मनप्रीत सिंग याची आंतरराष्ट्रीय हॉकी महासंघातर्फे (एफआयएच) दिल्या जाणाऱ्या वर्षातील सर्वोत्कृष्ट पुरुष हॉकीपटूच्या पुरस्कारासाठी निवड झाली आहे. मिडफिल्डर असणारा २७ वर्षीय मनप्रीत हा पुरस्कार पटकावणारा पहिलाच भारतीय हॉकीपटू ठरला आहे.
या पुरस्काराच्या शर्यतीमध्ये मनप्रीतने बेल्जियमचा आर्थर वॅन डोरेन आणि अर्जेंटिनाचा लुकास विला यांना मागे टाकले. मनप्रीतला सर्वाधिक ३५.२ टक्के मते मिळाली. डॉरेनला १९.७, तर विलाला १६.५ टक्के मते मिळाली. २०११ साली भारतीय संघात पदार्पण करणाऱ्या मनप्रीतने २०१२ आणि २०१६ च्या ऑलिंपिकमध्ये देशाचे प्रतिनिधित्व केले होते. त्याने आतापर्यंत २६० आंतरराष्ट्रीय सामने खेळले आहेत. मागील वर्षी मनप्रीतच्या नेतृत्वाखालील भारतीय संघाने एफआयएचच्या ऑलिंपिक पात्रता स्पर्धेत विजय मिळवून टॉकियो ऑलिंपिकमधील प्रवेश निश्चित केला होता.
दरम्यान, एफआयएचचे मुख्य कार्यकारी अधिकारी थिएरी वेल, तसेच हॉकी इंडियाचे अध्यक्ष महंमद मुश्ताक अहमद यांनी मनप्रीतचे हा पुरस्कार मिळाल्याबद्दल अभिनंदन केले आहे. या वर्षी भारताच्या विवेक सागर प्रसाद आणि लालरेमसियामी या हॉकीपटूंनाही एफआयएचचा अनुक्रमे पुरुष व महिला गटातील सर्वोत्कृष्ट उदयोन्मुख हॉकीपटूचा पुरस्कार मिळाला होता.
कोट
या पुरस्कारासाठी निवड होणे हा मी माझा सन्मान समजतो आणि मला हा पुरस्कार माझ्या संघाला समर्पित करायला आवडेल. त्याचप्रमाणे, माझ्यासाठी मतदान करणाऱ्या जगभरातील हॉकीप्रेमींचा मी ऋणी आहे.
- मनप्रीत सिंग, भारतीय हॉकी संघाचा कर्णधार