टोकियो ऑलिंम्पिक २०२०: न्यूझीलंडविरुद्ध टीम इंडियाची पहिली लढत

टोकियो: पुढील वर्षी होणाऱ्या टोकिओ ऑलिंम्पिक २०२०मध्ये भारतीय हॉकी संघाचा कार्यक्रम जाहीर झाला आहे. भारताच्या पुरुष संघाचा पहिला सामना २५ जुलै रोजी न्यूझीलंडविरुद्ध होणार आहे. तर महिला संघाचा पहिला सामना नेदरलँड विरुद्ध होणार आहे.

आंतरराष्ट्रीय ऑलिंम्पिक महासंघाने मंगळवारी यासंदर्भातील वेळापत्रक जाहीर केले. यानुसार भारताचे दोन्ही संघ स्पर्धेच्या पहिल्याच दिवशीच सामन्याला सुरुवात करतील. भारतीय संघाने आठ वेळा ऑलिंम्पिकमध्ये सुवर्ण पदक जिंकले आहे. न्यूझीलंडनंतर भारताचा मुकाबला ऑस्ट्रेलियाविरुद्ध २६ जुलै रोजी होणार आहे. भारतीय संघ ग्रुप ए मध्ये असून २८ जुलै रोजी स्पेन, त्यानंतर गत विजेता अर्जेंटिनाविरुद्ध ३० जुलै रोजी आणि अखेर यजमान जपानविरुद्ध ३१ जुलै रोजी भारताच्या पुरुष संघाची लढत होणार आहे.
वाचा-टीम इंडियाचं टेन्शन संपलं; मुख्य अस्त्र संघात दाखल!
महिलांचा संघाचा पहिला सामना २७ जुलै रोजी जर्मनी विरुद्ध होणार आहे. त्यानंतर २९ जुलै रोजी इंग्लंड, ३१ जुलै रोजी आयर्लंड आणि एक ऑगस्ट रोजी दक्षिण आफ्रिकेविरुद्ध भारतीय महिला संघाचा सामना होणार आहे. या वेळापत्रकानुसार महिला संघ सहा ऑगस्ट रोजी तर पुरुषांचा संघ सात ऑगस्ट रोजी सुवर्ण पदकांसाठी लढतील.
वाचा-वर्ल्ड कप जिंकायचाय; टीम इंडियाच्या कर्णधाराने घेतला पृथ्वी शॉचा सल्ला!
जागतिक हॉकी क्रमवारीत भारताचा पुरुष संघ पाचव्या स्थानावर आहे. भुवनेश्वरमध्ये झालेल्या पात्रता फेरीतच्या सामन्यात रशियाचा ११-३ने पराभव करत भारतीय संघाने ऑलिंम्पिकचे तिकीट मिळवले होते. तर महिला संघ क्रमवारीत नवव्या स्थानावर आहे. त्यांनी पात्रता फेरीत अमेरिकाचे ६-५ ने पराभव केला आणि ऑलिंम्पिकचे तिकीट पटकावले.

भारतीय हॉकी संघाने १९२८ ते १९५६ अशा सलग आठ ऑलिंम्पिक स्पर्धेत सुवर्ण पदक जिंकले आहे. त्यानंतर १९६४ आणि १९८०च्या स्पर्धेत भारताने सुवर्ण जिंकले होते. २०१६च्या ब्राझील येथे झालेल्या स्पर्धेत भारतीय संघ आठव्या स्थानावर होता.