ज्युनिअर मुलींची राष्ट्रीय हॉकी स्पर्धा
म. टा. क्रीडा प्रतिनिधी,नागपूर
सामन्यात एका गोलने पिछाडी झाल्यानंतरही विदर्भाने जोरदार मुसंडी मारत मध्य भारत हॉकी संघाला १-१ असे बरोबरीत रोखले. हॉकी इंडियातर्फे भोपाळ (मध्यप्रदेश) येथे ज्युनिअर मुलींची 'बी' डिव्हिजन राष्ट्रीय हॉकी स्पर्धा सुरू आहे. विदर्भाची तिसरी साखळी लढत बेंगळुरू हॉकी असोसिएशनविरुद्ध २४ एप्रिलला होईल.
सलामी लढतीत गोवा संघाला पराभूत करून स्पर्धेत विजयी सलामी देणाऱ्या विदर्भ संघाची दुसऱ्या लढतीत मध्य भारत हॉकी संघाशी झुंज झाली. ऐशबाग हॉकी स्टेडियम मैदानावरील झालेल्या सामन्यात मध्य भारत आणि विदर्भ संघ विजय प्राप्त करण्याच्या उद्देशानेच रिंगणात उतरले. सामना सुरू होताच, म्हणजे ५ व्या मिनिटाला मध्य भारत संघाने आक्रमण केले. परंतु, विदर्भाच्या खेळाडूंनी नियमबाह्यपद्धतीने संरक्षण केले. त्यामुळे मध्य भारत संघाला पेनॉल्टी कॉर्नर देण्यात आले. या संधीचा फायदा घेत आयुशी पटेलने गोल नोंदवून संघाला १-० अशी आघाडी मिळवून दिली. परंतु, विदर्भाने ही आघाडी अधिक काळ कायम ठेवली नाही. १० मिनिटाला केलेल्या चढाईत मध्य भारत संघाच्या खेळाडूंनी नियमबाह्य पद्धतीने संरक्षण केल्यामुळे विदर्भाला पेनाल्टी कॉर्नर मिळाले. सहकारी खेळाडूंच्या मदतीने यज्ञा सांगोळेने गोल नोंदवून १-१ अशी बरोबरी साधली. उभय संघाच्या खेळाडूंनी आघाडी घेण्याच्या उद्देशाने आक्रमणाची गती वाढविली. मध्यंतरापर्यंत बरोबरी कायम राहिली. मध्यंतरानंतरच्या खेळातही विदर्भ आणि मध्य भारत संघाच्या खेळाडूंनी अनेक आक्रमणे केली. मात्र, संरक्षण भक्कम असल्यामुळे कुणालाही गोल करण्यात यश आले नाही. मध्यंतरापूर्वीची गोलसंख्या सामना संपेपर्यंत कायम राहिल्यामुळे लढत बरोबरीत संपली.