म. टा. प्रतिनिधी, पुणे
पुण्याच्या गार्गी पवार, बेला ताम्हणकर यांनी ओम दळवी स्मृती मायक्रो इंडिया करंडक अखिल भारतीय मानांकन सुपर सीरिज टेनिस स्पर्धेतील १८ वर्षांखालील मुलींच्या एकेरीतून उपांत्यपूर्व फेरी गाठली.
औंधमध्ये महाराष्ट्र पोलिस जिमखान्याच्या टेनिस कोर्टवर ही स्पर्धा सुरू आहे. द्वितीय मानांकित बेला ताम्हणकरने पुण्याच्याच स्नेहा रानडेवर ६-२, ६-२ असा, तर चौथ्या मानांकित गार्गी पवारने तमिळनाडूच्या वैष्णवी वेंकटेशवर ६-२, ६-१ असा विजय नोंदविला.
अन्य लढतींत महाराष्ट्राच्या आकांक्षा निट्टुरेने तेलंगणच्या संस्कृती दमेराला ६-२, ६-३ असा धक्का दिला. संस्कृतीला तिसरे मानांकन होते. अव्वल मानांकित सुदीप्ताकुमारने महाराष्ट्राच्या दिविजा गोडसेवर ६-०, ६-० अशी, कर्नाटकच्या गायत्री बालाने तेलंगणच्या आयरा सूदवर ६-३, ६-३ अशी, तर गुजरातच्या माही पांचालने पुण्याच्या इला दाढेवर ६-२, ६-४ अशी मात केली. महाराष्ट्राच्या कामया परबला पराभवाला सामोरे जावे लागले. तेलंगणच्या चरिता पटलोलाने कामयावर ६-२, ६-२ अशी मात केली.
मुलांच्या गटात प्रणीत कुदळेने महाराष्ट्राच्याच सर्वेश बिरमानेवर ६-१, ६-४ अशी, तर चौथ्या मानांकित आर्यन भाटियाने महाराष्ट्राच्याच कणव गोयलवर ६-४, ७-५ अशी मात केली आणि उपांत्यपूर्व फेरी गाठली.
उप-उपांत्यपूर्व फेरीचे निकाल : मुले : सुहित लंका (तेलंगण) वि.वि. उदीत कंबोज (हरियाणा) ६-४, ६-२; मोहित बेंद्रे (गुजरात) वि.वि. राजेश कन्नन (तमिळनाडू) ६-०, ६-२; सुशांत दबस (आसाम) वि.वि. चेतन गडियार (गुजरात) ६-२, ७-६ (४); डेनिम यादव (मध्य प्रदेश) वि.वि. गिरीश चौगुले (महाराष्ट्र) ६-३, ६-३; कार्तिक सक्सेना (दिल्ली) वि.वि. अमित आर. (पश्चिम बंगाल) ७-५, ६-२.