मुंबईः डॉ. शिरोडकर, स्वस्तिक मंडळ, अंकुर स्पोर्ट्स, ज्ञानशक्ती युवा यांनी महाराष्ट्र कामगार कल्याण मंडळ आयोजित महिला गट राज्यस्तरीय कबड्डी स्पर्धेत विजयी सलामी दिली. तर रौप्यमहोत्सवी शहरी व्यावसायिकमध्ये पुरुषांत भारत पेट्रोलियम, ठाणे मनपा आणि ग्रामीण व्यावसायिक गटातील पुरुषांत महालक्ष्मी भोजनालय, वैभव नागरी पतसंस्था यांनी पहिल्या साखळी विजयाची नोंद केली.
मुंबईतील हुतात्मा बाबू गेनू मुंबई गिरणी कामगार क्रीडा भवनाच्या मैदानावर सुरू असलेल्या या स्पर्धेतील महिलांच्या सामन्यात मुंबई शहराच्या डॉ. शिरोडकरने मुंबई उपनगरच्या माऊली स्पोर्ट्सचा २८-२१ असा पराभव करत विजयी सलामी दिली. नेहा कदम, सेजल जाधव यांच्या आक्रमक सुरुवातीमुळे शिरोडकरने विश्रांतीपर्यंत १७-०९अशी आघाडी घेतली होती.
कुर्ल्याच्या स्वस्तिक क्रीडा मंडळाने ठाण्याच्या संकल्प मंडळाचा ४०-२३ असा पाडाव करत आगेकूच केली. सावध खेळ करीत मध्यांतराला १७-१३ अशी आघाडी घेणाऱ्या स्वस्तिकने मध्यांतरानंतर खेळ गतिमान करत विजय साकारला. चेतना बटावले, शोभा जाधव, अमिता चाळके यांच्या चतुरस्त्र खेळाला स्वस्तिकच्या विजयाचे श्रेय जाते. संकल्पच्या मेघना व भावना या खेडेकर भगिनी चमकल्या. मुंबई शहराच्या अंकुरने उपनगरच्या स्वस्तिकचा ५८-१५ असा धुव्वा उडवत दुसऱ्या फेरीतील स्थान निश्चित केले. विश्रांतीला अंकुरकडे २७-१० अशी आघाडी होती. अंकुरकडून रेखा चिकणे, कांचन जुईकर, तर स्वस्तिक महिलांच्या सेजल तावडे, मनाली चव्हाण छान खेळल्या. नवशक्ती अकॅडमीने ज्ञानशक्ती युवा संस्थेला २७-२६ असे चकविले. विजेती घोले, गायत्री देवळेकर यांच्या उत्तरार्धातील जोरदार खेळाला नवशक्तीच्या विजयाचे श्रेय जाते.
\Bसामन्यांचे निकाल\B
व्यावसायिक ग्रामीणः महालक्ष्मी भोजनालय (सावंतवाडी) विजयी वि संत नरहरी पतसंस्था ३७-२४ . वैभव नागरी सहकारी पतसंस्थ विजयी वि. ऑर्बिट इंजिनियरिंग ४७-१७. अवचट इंडस्ट्री विजयी देसाई ब्रदर्स ३६-०९. इंदिरा सूत गिरणी विजयी वि. समता महिला पतसंस्था ४४-२३.
व्यावसायिक शहरीः भारत पेट्रोलीयम (शिवडी) सिमेन्स सांस्कृतिक संस्था ४७-१७. ठाणे मनपा विजयी वि रूनवाल फॉरेस्टस ४८-१६.