भारतीय कबड्डी संघ गैरहजर
दिल्लीतील चाचणीला दोन्ही संघांची अनुपस्थिती; आता ३० सप्टेंबरला सुनावणी
वृत्तसंस्था, नवी दिल्ली
दिल्लीच्या इंदिरा गांधी राष्ट्रीय स्टेडियममध्ये दिल्ली उच्च न्यायालयाच्या आदेशानुसार हौशी कबड्डी महासंघ आणि न्यू कबड्डी फेडरेशन यांच्यातील लढतीचे आयोजन करण्यात आले होते, पण या सामन्यासाठी आशियाई क्रीडा स्पर्धेत खेळलेले दोन्ही भारतीय संघ आलेच नाहीत. यासंदर्भात दिल्ली उच्च न्यायालयात ३० सप्टेंबरला सुनावणी होणार असून त्यावेळी शनिवारी घडलेला घटनाक्रम न्यायालयासमोर ठेवण्यात येईल. सकाळी ११ वाजता ही चाचणी होणार होती पण तीन तास प्रतीक्षा केल्यानंतरही राष्ट्रीय संघ तिथे उपस्थित राहिले नाहीत. या चाचणीसाठी न्यायालय नियुक्त निरीक्षक एस. पी. गर्ग उपस्थित होते.
२ ऑगस्टला दिल्ली न्यायालयाने आदेश दिल्यानंतर गेल्या महिन्यात बेंगळुरू येथे न्यू कबड्डी फेडरेशनने चाचणी आयोजित करून आपले पुरुष व महिला संघ निवडले. हे संघ आशियाई स्पर्धेत खेळलेल्या संघांना शनिवारी दिल्लीतील इंदिरा गांधी स्टेडियममध्ये टक्कर देणार होते. पण शनिवारी ११ वाजता ही लढत निश्चित झालेली असतानाही आशियाई स्पर्धेत खेळलेले पुरुष व महिलांचे संघ उपस्थितच राहिले नाहीत. या स्टेडियममध्ये दिल्लीतील काही छोटी मुले गोळा झाली होती. ती या चाचणीचा भाग असल्याचे दाखविण्याचा प्रयत्न असल्याचा आरोपही न्यू कबड्डी फेडरेशनच्या वतीने करण्यात आला.
न्यू कबड्डी फेडरेशनच्या वतीने अर्जुनवीर होनप्पा आणि राजरत्नम यांनी न्यायालयात दावा केला होता की, राष्ट्रीय कबड्डी संघ निवडताना गैरप्रकार झालेले आहेत. त्यावर न्यायालयाने आदेश दिले होते की, १५ सप्टेंबर रोजी ११ वाजता निवड चाचणी आयोजित करा. होनप्पा म्हणाले की, हौशी कबड्डी फेडरेशनने आपल्या संघांना या चाचणीसाठी आमंत्रित करण्यास सांगण्यात आले होते. पण दोन दिवसांपूर्वीच त्यांनी वेबसाईटवर दिल्लीत चाचणी होणार असल्याचे एक वाक्य टाकले. ती चाचणी नेमकी कुठे होणार याचा थांगपत्ता लागू दिलेला नाही.
यासंदर्भात न्यू कबड्डी फेडरेशनचे वकील भरत नागर यांच्याकडे विचारणा केल्यावर ते म्हणाले की, दिल्ली न्यायालयाने दिलेल्या आदेशाचा अर्थच तसा आहे की, संघांना चाचणीसाठी आमंत्रित करावे. आम्ही या चाचणीसाठी इथे दाखल झालो होतो, पण राष्ट्रीय संघ आलेच नाहीत.
भारतीय हौशी कबड्डी महासंघाचे सहसचिव देवराज चतुर्वेदी या चाचणीसाठी उपस्थित होते त्यांना यासंदर्भात विचारणा केल्यावर ते म्हणाले की, मी फक्त दिल्ली उच्च न्यायालयाने जे आदेश दिले आहेत त्याचे पालन करत आहे. न्यायालयाचे आदेश नेमके काय आहेत, हे विचारल्यावर ते म्हणाले की, मला माहीत नाही पण तुम्हीच ते वाचा. मला यात अडकवू नका. मी हौशी कबड्डी फेडरेशनचा पगारी कर्मचारी आहे. माझे पद सहसचिव असले तरी मला पगार मिळतो. माझे काम होते, या चाचणीसाठी पंचांना आणणे आणि व्यवस्था पाहणे ते काम मी करत आहे.