म. टा. विशेष प्रतिनिधी, मुंबई
प्रो कबड्डी लीगच्या सहाव्या हंगामात खेळाडूंवर लागलेली बोली कोटीच्या आकड्यांना स्पर्श करणार का, याविषयी कुतुहल होते. पण तब्बल सहा जणांनी कोटींची बोली मिळवत विक्रमांची नवी शिखरे रचली. मोनू गोयत या मूळच्या हरयाणाच्या चढाईपटूने १.५१ कोटींची घसघशीत बोली मिळविली. हरयाणा स्टीलर्स या संघाने त्याला काबीज केले. ही प्रो कबड्डीच्या आतापर्यंतच्या पाच हंगामातील सर्वोच्च बोली ठरली. पण त्याखालोखाल इतर पाच खेळाडूंनीही एक कोटींची बोली मिळविली.
प्रो कबड्डीच्या सहाव्या हंगामासाठी झालेल्या या लिलावाच्या पहिल्या दिवशी १२ फ्रँचाइझींमध्ये जोरदार संघर्ष पाहायला मिळाला. मोनू गोयतला गेल्या वर्षी पटना पायरेटसने ४४.५ लाखांना ताफ्यात घेतले होते. त्याने यावेळी सर्वांनाच मागे टाकून हरयाणा संघात स्थान मिळविले. बुधवारी सगळ्यांचे लक्ष होते ते राहुल चौधरी, अनुप कुमार, नितीन तोमर, दीपक हूडा, रिशांक देवाडिगा या भारतीय खेळाडूंवर आणि त्यातील अनुप कुमारचा अपवाद वगळता इतरांनी दमदार बोली मिळविली. भारतीय संघाचे कर्णधारपद भूषविणाऱ्या अनुपला केवळ ३० लाखांची बोली मिळाली.
दुपारी इराणच्या फझल अत्राचलीने सर्वप्रथम कोटीच्या शिखराला स्पर्श केला, तेव्हा सर्वांच्याच भुवया उंचावल्या, पण काही तासांत भारतीय खेळाडूंवर लागलेल्या बोलीत दीपक निवास हूडा आणि नितीन तोमर यांनी १.१५ कोटींची बोली घेत विक्रमाची नवी झेप घेतली. प्रो कबड्डीच्या गेल्या पाच हंगामातील ही सर्वाधिक बोली होती. गेल्या वर्षी याच नितीन तोमरने ९३ लाखांच्या बोलीसह पहिला क्रमांक मिळविला होता. यावेळीही तो पहिल्या क्रमांकावरच राहिला, पण त्याला नंतर हूडाचीही साथ मिळाली. त्यानंतर रिशांक, राहुल व मोनू यांनीही आघाडी घेतली.
प्रो कबड्डीतील करोडपती खेळाडू
मोनू गोयत (१.५१, हरयाणा स्टीलर्स)
राहुल चौधरी (१.२९ कोटी, तेलुगू टायटन्स),
दीपक हूडा (१.१५ कोटी, जयपूर पिंक पँथर्स),
नितीन तोमर (१.१५ कोटी, पुणेरी पलटण),
रिशांक देवाडिगा (१.११ कोटी, यूपी योद्धा),
फझल अत्राचली (१.०० कोटी, यू मुम्बा)