म. टा. क्रीडा प्रतिनिधी, मुंबई
मध्य रेल्वे विरुद्ध देना बँक यांच्यातील लढतीने प्रभादेवी सार्वजनिक गणेशोत्सव मंडळ आयोजित राज्यस्तरीय पुरुष व्यावसायिक गट कबड्डी स्पर्धेला आजपासून सुरुवात होईल. महाराष्ट्र राज्य व मुंबई शहर कबड्डी असो.च्या मान्यतेने प्रभादेवी येथील मुरारी घाग मार्गाजवळील क्रीडांगणावर होणाऱ्या या स्पर्धेत १२ निवडक व्यावसायिक पुरुष संघांना प्रवेश देण्यात आला आहे. २६ ते ३० एप्रिल दरम्यान रंगणारी ही स्पर्धा मॅटवर खेळवण्यात येईल. कबड्डीप्रेमींना यानिमित्ताने प्रो कबड्डीतील स्टार खेळाडूंच्या खेळाचा आनंद घेता येईल. विजयी संघाला चषक व एक लाख एकावन्न हजार रुपयांचे पारितोषिक मिळेल. उपविजेत्या संघास चषक व एक लाख रुपये मिळतील. सामने प्रथम साखळी व नंतर बाद पद्धतीने खेळविण्यात येतील.
संघाची गटवारी:
'अ' गट- महिंद्रा, देना बँक, मध्य रेल्वे. 'ब' गट- नाशिक आर्मी, एअर इंडिया, मुंबई पोर्ट ट्रस्ट. 'क' गट- बीईजी पुणे, महाराष्ट्र पोलीस, बँक ऑफ इंडिया. 'ड' गट- आयकर पुणे, भारत पेट्रोलियम, युनियन बँक.