कोलकाताः तमिळ थलैवाज या प्रो कबड्डी लीगमधील संघाचे प्रशिक्षक ई भास्करन आपल्या पदावरून पायउतार झाले आहेत. सुमार कामगिरीमुळे या संघाच्या प्लेऑफच्या आशा संपुष्टात आल्या आहेत. सलग तिसऱ्या मोसमात त्यांचे आव्हान साखळीतच संपुष्टात आले आहे. भास्करन यांनी गेल्या मोसमात या संघाच्या प्रशिक्षकपदाची सुत्रे हाती घेतली होती. गेल्यावर्षीही या संघाने त्यांच्या झोनमध्ये तळ गाठला होता. यंदा राहुल चौधरी, मोहित चिल्लर, रणसिंग, अजय ठाकूर अशी खेळाडूंची तगडी फौज असूनही या संघाला आतापर्यंत १५ पैकी फक्त तीन सामने जिंकता आले आहेत. तर त्यांच्या दोन लढती बरोबरीत सुटल्या आहेत.
भास्करन यांनी म्हटले आहे की, 'तमिळ संघासोबतचा दोन मोसमांचा माझा प्रवास इथेच संपतो आहे; कारण मी प्रशिक्षकपदाचा राजीनामा देतो आहे. माझा प्रशिक्षकपदाचा २८ वर्षांचा अनुभव पणाला लावला; पण तमिळ संघाला तारू शकलो नाही. खेळ म्हटला असे होणारच.. दोन अर्जुन पुरस्कारविजेते आणि एक पद्मश्री खेळाडूचा सहभाग असलेल्या संघाचा मी प्रशिक्षक होतो हा माझा सन्मानच...'
\Bप्रो कबड्डीची फायनल अहमदाबादला
\Bअहमदाबादः यंदाच्या प्रो कबड्डी लीगची फायनल व प्लेऑफच्या लढती अहमदाबाद येथे होतील, असे लीगच्या आयोजकांकडून मंगळवारी सांगण्यात आले आहे. वेळापत्रकः १४ ऑक्टोबर- एलिमिनेट १ (लीगमधील तिसरा संघ विरुद्ध सहावा संघ). एलिमिनिटेर २ चौथा संघ वि. पाचवा संघ. १६ ऑक्टोबरः उपांत्य फेरी १- लीगमधील पहिला संघ वि. पहिल्या एलिमिनेटरमधील विजेता. उपांत्य फेरीत २- लीगमधील दुसरा संघ वि. एलिमिनेटर २ मधील विजेता. १९ ऑक्टोबरः अंतिम फेरी- पहिल्या उपांत्य फेरीतील विजेता वि. दुसऱ्या उपांत्य फेरीतील विजेता.